ДIаяхача гуйран денош геттара шийла, дарзе лаьтта ха яр из. БIайхача мехка дIадолхаш доацаш, Iа даккха диса кагий оалхазараш геттара матардахе, шелало гергдийя, йIайхагIйола моттиг лехаш дIатеIа ха я из... ДIайхача цIагIара корах арахьежаш, дукха уйла йора аз цар, малагIа дика дергдар-хьогI шоана, яхаш. Цхьа геттара дега хало хулаш, къа хеталора царех, уж зувш. Нах дIа-хьа баьлча, лакхе турба тIара, гаьнаш тIара Iолохедаьле, котамашта тессача ялатах йиса хIамилгаш юаш, деррига хобаделе, матардахе кхестар уж. Тхьовра, ара йIайха латтача хана, хозаш хинна цар зовне «цIар-цIар» а хозаш дацар... Шелалга тоIа ца дайта гIерташ, моцалга ца доадайта гIерташ, кхестар уж мискаш. Цар уйла йора аз денна. Са дагардар хайча санна, хьачувена вагIаш, цхьайтта шу даьннача кIаьнка аьлар, хьазилгашта цIалг де безам боагIар са, аьнна.

— Ай, геттара дика да-кх, хоастам Сийдолча АллахIа, из хьона дагатассарах, ховргдий хьона? — аьлар аз.

— Ховргда, даьра, иштта хала дац из де-м. Интернета чугIолла хьежав со, уж мишта хьаду, — аьлар кIаьнка.

Корах арахьежаш, бIаргагора цунна ков дизза ягIача гаьнаш тIа тувсалуш лела гIорадаь оалхазараш. Къа деций цар, шийла еций царна?! Уж хIана дахадац бIайхача мехка Iа даккха, лергдий уж гIорадаь, яхаш, дукха хаттараш дар, дунен хIама довза волалуча кIаьнка. Цун мел дола хаттараш доашхаш яьгIар со, тIаккха, деррига дIалоацаш ла а дийгIа:

— Вай царга хьажа дезаш дий, Дала иштта оттадаьдий из? — хаьттар цо.

— Вай оттадаьд Дала царга хьажа! Уж низ боацаш, миска оалхазараш да, царна тахан даь дика, Дала кхоана бIаргадайтаргда вайна. Иштта хозача къахетамца, шийна ялсмале яккха йиш йолаш ва моллагIа саг, хIаьта вай, бусалба наха, из цIаккха а дицде йиш яц, — аьлар аз.

Соца къамаьл даь араваьннача кIаьнка, херх хьокхаш, гон етташ, хьазилгашта цIалгаш де ший болх дIаболабир. Цхьан дийнахьа ши цIалг хьаде низ хилар цун. Интернете Iочу а хьежаш, геттара дика а даьдар цIалгаш. ГIадваха, из шийна харах, сиха гаьн тIагIолла урагIваха, зIамагIвола воша а шийна новкъостал де оарцагIваьккха, лаккха гаьнах дIадехкар цIалгаш. ЧIоагIа сагота вар из, дIачугIоргдий хьазилгаш цу чу, йIайхагIа хургйий царна хIанз, яхаш. Гуйре а цун тIехьа Iа а дIадаьлар, кIаьнк цIалгашкахьа урагIхьежаш, цар чу хьазилгаш даха ховшарга сатувсаш, Даьлага дуIа деш лелаш. Массехк ди хьалха, вена чуийккхар из со йолча. Сов чIоагIа гIадваха волаш, сатийна хьадувцалацар цунна ше ала гIертар:

— БIарий гаьна лакхе аз дIаделлача цIалга чу хьазилгаш даха хайшад. Со хьалтIаваьнна дIачухьежача, хIетта яь кIоригаш яда цу чу. Ма чIоагIа гIадвахав со! ДогIаш ма латтий вайна, цудухьа, кIалха царна шийла хургйоацаш, опилкаш тайсар аз. Цхьаккха хIамах кхера ца езаш, йоккха хиллалца шоашта паргIата ядаргья цу чу кIоригаш, яхаш, вувхьар из, дерригача дунен ираз ший коанашка дессача санна... ДIавенна из, дог айденна, кхы а цIалгаш де хьайзар. ХIанз, хIара дийнахьа Iурра гIаттарца, цу цIалгашта кIалха хьазилгашта ялат тасса ух ИбрахIим, шийца зIамагIвола воша Юсуф ваьккхе.

Бусалба нах, вайга дукхача хIаман уйла яйташ да из гIулакх. ЗIамига болча хана денз, дийнача хIамаех къахета, цар лерхIам бе, Даьла раьза хургвола гIулакхаш де вай бераш Iомадеш хилча; деш, дуташ хIама доацаш, карта йистошка гулбенна, беш пайда боацаш, урамашка болабенна лелараш кIезигагIа хургбар! Телефона чура бIарг ца боаккхаш, мекъало дIалийца, цIагIа дивана тIа бадачул дикагIа, хозагIа деций, иштта, цхьа беркате гIулакх хьа а лаьца, цу тIехьа дIабахача? Ше даьча цIалга чу, оалхазаро ший дезал кхебаро гIадвига кIаьнк, геттара цу гIулакхах бIубенна; кхы а уж цIалгаш хьаде чам чубенна; дахчаш, хьастамий, шруповерт кийчъяь, лаьрххIа къахьегаш вар. Юкъ-юкъе оалар, маьл хургбий сона укхох? Вайна цхьа башха дац аьнна хийтта цхьадола гIулакх, доккхача дикашка бода никъ хиле дIаотт! Дала хьакхеллача, садоаллача мискача хIаман вахар, Iа хьай кулгашца аттача даккхар, хам баь варгвоаца дика да! Беркате Iадат хинна дIагIоргда хIанз тха коа, хьазилгашта цIалгаш ду гIулакх.