Цо яхачох, беза мархий бутт хьахилча денз, хӀара сайрийна нах чубехаш, марха доастийташ, уж вӀашагӀтохаш, царна шоайла кхетаченаш еш, къахьийгар цар. Тайп-тайпарча урхалленашкара бийхар уж. Масала, «Дикая дивизия» оала тоаба яр, ахархой, хьехархой, йоазанхой, суртанчий тоабаш яр. «Ираз» яхача кхалнаьха юкъарлонна доакъашхой бар, модз доаккхараш бар, дуккха а кхыча организацей викалаш бар цига сарахьа марха даста чубехаш хиннараш. Духхьал марха даста чубеха нах вӀашагӀтохар хинна Ӏацар из. Цига таро хилар тайп-тайпара викторинаш дӀаяхьа. Цул совгӀа, берашта-бошта, иштта таро йоацарий дезалашта тӀабувха гӀирс ийцар, 89 бер чулоацаш. ЛаьрххӀа сагӀа доаккхаш бола болх а дӀабихьар. Таро йоацарашта, дукха деце а, сагӀа луш хиларах гӀулакх хулар, хӀана аьлча цхьайола кхачан продукташ эца йиш йоацаш бола дезал а бар вай мехка. Цудухьа царна из дӀакхачийта ловш хулар уж. Тикашка а, лаьрххӀа шоай берашца дӀа а бахе, царна эшаш дола барзкъа хьахаржа вӀаштӀехьдаьккхар, цу хьакъехьа лаьрххӀа дола «Тешам» фонда сертификаташ дар цу наха дӀаденна, цу тӀа мах латтар, цу маьхах барзкъа харжа таро яр цар.

Таро йоацача наьха дог хьастар, чӀоагӀа эшаш хӀама да. Даьлагахьара боккха маьл а хул цу юкъе дакъа лаьцарашта. Мархий бетта хьа а вена цхьан сага шийгара ахча Ӏодилладар, ший цӀи ма яккха аьнна, цунна дозал цадоадар духьа. Цу ахчах бӀарчча бетта нахага марха дастийта таро хилар хӀара сайрийна. Духхьал марха даьста Ӏацар цига. Тайп-тайпара динца дувзаденна, къаман мотт кердабоаккхаш, Ӏадаташ дувцаш дола хаттараш увттадир гулбеннарашта хьалхашка. Царна нийса жоп дала ховш хиларах, хоадабора моллагӀа долча хаттара мах. Дика ховраш а бар, массехк юхаозалуш хиннараш а бар, бакъда массанена цхьатарра пайда хулар цунах. Цига дакъалоацаш вай къаман цӀихеза йоазонхой, наха дика бовзаш бола нах бар. Безаме вагӀар а шоайла пайда эцар а хулар цига.

Кхыметтел арахьара лаьрххӀа цига дакъа лаца цӀабаьхка нах а бар цига. Дукхача хӀаман маьха дар цу тайпара вӀашагӀкхетар. Цу безача Рамадан бетта, шоашкара сагӀа даккха ловраш дукха бар. Масала, таро йоацача фусамашта новкъостал дир, хӀаьта берашта тӀабувха гӀирс эцара ахча гулдаьраш нах шоаш бар. ХӀаранена ловш дар шийгара цу юкъе дакъа лаца. Цул совгӀа, кхачан продукташ дӀаекъаш бола болх а бир «Тешам» фондо. Цига геттара чӀоагӀа накъабаьлар шоай лоӀаме къахьегаш бараш, уж хиннабецаре иштта из болх дӀа а гӀоргбацар, хӀана аьлча массанахьа кхача ма везий. ДукхагӀа «Тешам» фонде болх дӀахьораш уж ба. Цудухьа къаьстта цу юкъе дакъа лоацаш хиннача кагийча наха, мехкарашта баркал ала ловш вар Осканаькъан Хьамзат. Мел чӀоагӀа рузкъа дале а, таро яле а из дӀакхачийта саг ма везий, наьха кулгаша хьадеш да из а. Шоашта маьл боаккхаш кагирхоша дӀахьош дукха болх ба тахан. Къаьстта мархий бетта из совбоалаш хулар. ТӀехьарча хана дукха маьждигаш ма дий вай мехка хьалдаь. Боккхача наькъа юхегӀолла доахкаш дола маьждигаш чу а лоацаш, хий а хурмаш а наха дӀаекъаш бола болх бар цу бетта тӀатеӀӀа дӀахьош. Маьждигашка дӀачу мел ваьннача хиш а хурмаш а Ӏоувттаяьяр, цул совгӀа наькъа боагӀача наха, уж марха даста кхоабергболаш, машенаш сувцаеш, дӀадийкъар хий а хурмаш а. Хоза гӀулакхаш вай къамах массаза даьхкад. Цу юкъе доккха дакъа дӀалоацаш хьабаьхкаб вай кагирхой, яхаш, дийцар тхона МагӀалбикерча Исламски университета хьехархочо Досхой Мадинас. Цо белгалдора, хӀара шера цу лоӀамеча къахьегамхой тоаба из гӀулакх бӀарчча мархий бутт йистебаллалца дӀахьош хилар. ТӀехьарча хана вай къаман хозача гӀулакхех хинна дӀаэттад из. Хоза масал да из, сагӀа даларал хозагӀа гӀулакх кхы малагӀа хургда. ДӀаяхача ханашка а, таро яле а еце а, сагӀа луш хиннад вай. Мархий бетта нах чубийхе а бой хьаьсте а, из оагӀув лорае хьежад вай къам. Къаьстта мутаӀаламашта сагӀа далар геттара а деза хиннад. Тха университете а шортта яа хӀама яхьаш хьабоагӀа нах, укхаза деша багӀача мутаӀаламашка марха дастийтара. Укх шера а иштта хилар. ХӀаравар цу шера цкъа мара ца боагӀача мархий бетта шийна маьл баргбола никъ лохаш хул. Из да вай Даьлах тешаш хилар а, вай Даьлах кхераш хилар а, Цунна диканга сатувсар а. Тахан дӀаденнар кхоана накъадаргда. Маьлехьа хилда вай мехкахоша даь Ӏибадат, цар денна сагӀа, цар Даьла духьа мел даьр.