Султан ваь хиннав 1934 шера маьтсела бетта 2 дийнахьа Дибаранаькъан Улубе Махьмадеи ГӀамарзанаькъан Ӏисакха Либеи дезале. Вай Сибре дугача хана, Буро тӀа 3-ча классе дешаш хиннав кӀаьнк. Темиртау яхача Казахстана чуйоагӀача моттиге баха сайцаб уж. Цига дӀахо деш Султана, бокъонца юкъера ишкол из яьккха воал, ший ткъо шу даьннача хана. Дезала да Махьмад болх беш хул гӀишлонхой организаце бухгалтер волаш. Из болх бу цо вай цӀадаьхкачул тӀехьагӀа Наьсарерча трикотажни фабрике а. Ше а дийша воландаь, кӀаьнкага а дешийта гӀерташ хиннав да. Султана ишкол Казахстане йоаккх, цул тӀехьагӀа, 1954 шера, деша отт цигарча лорий институте. Кхы а кхо шу даьлча, вайнаха цӀабахка мукъа лу.

ХӀаьта а Султан кхы а шин шера Караганде ший дешар дӀахо дешаш хул. Дийша ваьлча, цо юххьанца болх бу Наьсарен кхален дарбанче; лергашта, къамаргашта, меража дарбаш ду лор волаш. Из цига волаш, дуккхача наьха таро хул шоай саготдеш хиннача лазарех къаста, хӀана аьлча цхьа талмаста хӀама деш оамал яцар лора, ший болх дика ховш а хьабеш а вар. Дукха гаьна доацаш, Дошлакъий-Юрта дар цун дай баьха ков, хьамсара юрт. Кастта, 1962 шера, цох хул Ӏарамхерча курорта керттера лор. Из болх цо бу 1964 шу тӀакхаччалца, цигара Шолжа-ГӀалий тӀа кхоач. Юххьанца цо къахьег ийслагӀча дарбанче кизга увттадеш, цунца цхьана медучилище хьехаш а хул. Кизга увттаде из Ӏемавар лаьрххӀа хӀирий мехка а ваха. Керда балха говзал яр цо цига караерзаяьр.

Болх дика беш вола саг ца зувш висац, цунга хьежжа гӀулакха тӀа лакх а ву из. Султан унахцӀенон министерстве болх бе хьожаву, дарбаш деча отдела воккхагӀвола инспектор волаш. Цига 5 шера къахьег цо, республикан дарбанчешка деш дола дарбаш дикагӀа, нах раьза хургболча тайпара дергдола гӀулакх вӀаштӀехьадаккха гӀерташ. Из болх дикка тоабе а мог цунна, ше цига къахьийгача юкъа. Цигара вай мехкахо хьожаву республикан онкологически диспансера керттерча лора заместитела болх бе. 1994 шерга кхаччалца Шолжа-ГӀалий тӀарча №1 йолча поликлинике, А. П. Чехова цӀерагӀча урам тӀа хиннача тубдиспансере кизга увттадеш а хилар из. Хетаргахьа, цу балхо кӀал а ют цун ший унахцӀено. Лакхе хьоахадаь шу хьатӀакхаьчача, кхохкаденна латта Шолжа-ГӀалий тӀара хьал тӀемга кхоачаш латтар. ОагӀой бетта 11-ча дийнахьа цигара арабаьле, Дошлакъий-Юрта боагӀа цар дезал. Султан, дукха ца говш, балха араваьлар. Из цу хана Наьсарен больницерча оргметодкабинета кулгал деш вар.

Укх тӀехьарча хана, гӀалгӀашта чӀоаггӀа эшаш бола нах дукха дӀабахаб дунен чура. Цхьадолча даькъе цар Ӏоажал хьалхаяьккхар вахара халонаша, къаманна тӀалаьттача саготонаша. Царех цаӀ вар Дибаранаькъан Султан. Из кхелхав 1997 шера бекарга бетта 2-ча дийнахьа.