Лакхе айса мел дийцар бакъдеш, дукха дика гIулакхаш бIаргадайнад сона а, дувцача газетаца бувзам оттабича денз. Из дар 1983 шу. ЦIаьхха, хинна хIама дацар со «Сердало» газете нийсъялар. 1980-ча шерашка Пригородни районе арадувлаш дар «Ленина байракх» яха газет, цу редакце балха яр со. Юххьанца газет оттадара гIулакх Iомадеча хана, со хьожайир Нохч-ГIалгIайчен Республикан Шолжа-ГIалий тIа арадувлаш хиннача «Сердало» газета редакце, балха говзал Iомаяра. Цу хана Кепайоазон цIа оалар дукхаза вIаштIара даьча цIенах. Цу чу яр «Сердало» редакци а. Бехктокхамеча секретара балха говзал сона Iомаеш хиннар вар Хамхой Мустафа. МалагIа материалаш хьалхарча газета оагIон тIа хила еза, малагIаш тIехьагIа оттае еза довзийтарал совгIа, цо со Iомайир безам тIагIоргболча тайпара йоазон хьалхара корта увттабе. Ше-ший мугIараш а йоазон кеп а хила езар цига. Масала, курсив, литературни, бажановский оалача алапий мугIараш дIанийсде, чулоацам малагIа хила беза, корта бIаьха мел хила беза яха боарам бар цо сона хьехаш хиннар. Шера массехказа йодар со цхьа кIира е ши кIира даккха, парте райкома бокъонца цига хьожайийя. Иштта Iомабир аз газета болх.

Цул тIехьагIа, геттара безам дIаийра са газета балхаца. Укх ткъаь барайтта шера, йоазонцара со хьакъаьста ха хиннаяц.

Бакъда сона хийттача беса атта хиннабацар журналиста болх, из чIоагIа чоалхане а, хала а. бехктокхаме а хиннабар. Цун кIоаргаленаш, къайленаш йовзара а яшхара а; дукха къахьега дезилга гуш дар. Юххьанца цхьа зIамига йоазув де сай таро хилча, из кепа теха IотIадаьнна сайна бIаргадайча, боккъал айса цхьа доккха хIама дича санна, гIадйодар со. Яздаьр а дукха тоаде дезаш хулар. Къонача газетчикашта цаховш дар хьахьехаш, эшаш дола гIо деш боккхагIбола журналисташ хиларах, тхона (къоначарна) аттагIа хулар каралаьца никъ дIабахьа. Дукха сона хьехамча волаш накъаваьннарех вар «Сердало» газета журналист Къоастой Башир, редактора заместитель Хамхой Мустафа, «Ленина байракх» газета редактор Малсаганаькъан Мухьмад, Осменаькъан Микаил, «Сердало» газета выпускающи Эгенаькъан Хьамид, таржамхо Пхьиленаькъан Ахьмад, кхыбараш. Цар хьехамца, новкъосталца журналиста говзал караерзайир аз. Уж тахан вайна юкъе боацаш ба, цигара фусам Дала даькъалайойла цар. Со санна кхы а итташ журналисташ хьалкхебир цар. Тахан а царна дег тIара баркал оал аз. Шоай къонгашта, мехкарашта санна; кхетам луш хьалкхедора тхо цар.

Къаьстта Буро тIара хиларах, со чIоагIа боча хулар цар шоаш болча кхаьчача. «Йоккхача Буро тIа, зIамига гIалгIай газет деш я ер», — аьле, бегаш бора цар. Тха балхах лаьца тайп-тайпара литература Iалашдир цар. «Сердало» газета редакце хьайийллар журналистий жанраш йовзийтара, макеташ оттае, таржам де Iомабара йола курсаш. Цу даькъ тIа къаьстта хьинаре къахьегаш вар таржамхо Аьдалгире Ахьмад, иштта кхыбараш. Цар тхона Iома а йир, йовза а йовзийтар журналистий жанраш, таржам дара техника, макеташ увттае а Iомадир. Къаьнеи къонеи аьнна боацаш, цхьа кIеззига хинна а шоаш шек болаш хIама нийсделча, дIа-юха хетташ, шоайла дагабувлаш, къахьегар журналисташа.

Къаьстта из гIулакх дукхагIа нийслора эрсий меттала долча йоазонна таржам де дезаш хилча, е газета макеташ оттаеча хана. ГIалгIай меттала газет арадувлаш хиларах. «Сердало» болхлой къахьегам геттара халеи чоалханеи бар, хIана аьлча цу ханашка хIанз санна дошлоргаш а даьржа дацар. Цудухьа къонабараш даим ветеранашца дагабувлаш хулар, гIалатбалар кхераш. ХIаьта а вIалла дагадоаца гIалат чакхдоалаш хулар, из бахьан долаш, дукха болхлой бехктокхаме озабезаш хулар.

Хьадаь даьнна газет, бе а лаьца, деша атта да, бакъда, из кепа теха арахецале, дукха къахьега деза цу тIа. Ше хьадечох дог лазаш, хьайх тийша тIачIоагIдаьча гIулакхах бехктокхаме вола саг цунна кертте ца хилча, газета гIулакх мела хила тарлу. Тахан вай республиканна боккха кхаъ ба, деррига гIалгIай меттала долаш, «Сердало» газет кепа тохаш хилар, из цIаккха а юкъах ца дусаш, ший ханнахьа арадоалаш да. Электронни оалача кепара а, иштта каьхата тIа кепа теха а газет вай мехкахошка хIара кIира кхоач, деша безам болчарна цу тIара хьаэца хIама а хул.

Дикадар мара ма нийслулда вайна хьалхашка, цу тIа арадаккха дезаш. Хозача хоамех диза хилда вайна массанена а хьамсара газет «Сердало»!