ХӀаьта интерната чу яхачунга ладувгӀе, уж таьрахьаш цхьа шу хьалхадаха деза (1882-1961). Царех нийсагӀа малагӀа да историкаша къоастадергда аьнна хет сона.

Мичча беса из дале а, 140 шу дизад гӀалгӀай къаман сийрда вахар хьалде гӀийртача, къаман совета председатель, Кавказа лоаман къамий парламента хьалхара председатель хиннача ДжабагӀанаькъан Иже Висангире. Шиъ лакхара дешар дийша хиннав Висангири, эггара хьалха цо яьккха хиннай Ригера политехнически институт, цул тӀехьагӀа цо дийшад Берлинерча юртбоахама институте. Революци ялале, из балха хиннав Россе лаьтта леладара директора заместитель волаш. ДӀахо а доккхийча гӀулакхаш тӀа хиннав из. Кавказа вӀашагӀкхийттача лоамарой ЦхьоагӀон кулгалхоех цаӀ хиннав, Лоамарой республикан паччахьалкхен доакъашхо а гӀалгӀай Къаман Совета кулгалхо а хиннав.

Советий Ӏаьдал тӀаденачул тӀехьагӀа, Висангири а цун воша Мухьмад а доазол арахьа дӀабахаб. 1927 шу тӀадалцца Висангири ваьхав Францерча Париже. ДӀахо Варшаве ваьхав из, газета редактора болх а беш. Цигара из ваха вода 1939 шера туркий мехкарча Стамбуле. Ший юхедиса шераш цига вахаш дӀахьу цо, цига кхалх. Туркий мехка дӀавеллав из ше а цун фусам-нана Лоли а.

Цар кхо йоӀ хиннай Хьулимат, из маьре хиннай тӀема лор хиннача Доврбиканаькъан тайпах волча полковникага. Еннай Хьулимат 1981-ча шера. ШоллагӀа хиннай Дженнет. Из Скибневский яхача полякага хиннай. Из кхалх Даькъасте цӀаенача юкъа, 1992-ча шера, дӀаеллай ГӀалгӀай мехка. КхоалагӀа йоӀ Тамара хиннай. Из черсечунга маьре а йолаш, туркий мехка яьхай.

ДжабагӀанаькъан Висангири хиннав воккха Ӏилманхо а политически болхло а, цу шинна лостамагӀа яздаь балхаш хиннад цун. Царех цхьадараш хетадаьд ахархой балха. вожаш — мехка доал дара.

Иже Висангири кхелхав туркий мехка 1962-ча шера