Лоамашка дахача къамашта къаьстта дика вовз аьнна хет сона Этуш Владимир Абрамович, хӀана аьлча берригача мехка дезаденнача «Кавказа есар» яхача кинокомеде керттера роль ловзаеш вар из. Ала деза, Леонид Гайдайс яьккха из кинокомеди, цӀаккха кӀорда ца еш, яхаш я вай телеэкранаш тӀа, тӀехьа тӀакхувча ноахалашта а, хьалха дӀабахарашта санна, дукха езаш.

Бакъда ГӀалгӀай мехка геттара боча ва Владимир Абрамович а цун цӀи а, хӀана аьлча 1942 шера из тӀом беш хиннав МагӀалбик моастагӀчох лораеш. Укх деношка 100 шу дуз Этуша. Цу хьакъехьа дувцаш, цо яздаьд, ше ваь денош шиъ да, аьнна.

Бокъонца из ваь хиннав 1922 шера маьтсела бетта (май) 6-ча дийнахьа. Бакъда цу заман чухьа кӀаьнкашта цхьа шу тӀерадоаккхаш хиннад, уж дӀаязбеш, эскаре болхача хана кхийна, дегӀ чӀоагӀденна хургболаш. Иштта нийсденнад Владимир Абрамовичаца а, из дӀаязваь хиннав 1923 шера ваьв аьнна.

Цудухьа, цун каьхаташка диллача, укх шера нийсса 100 шу дуз цун. Цо болх баьб Е. Б. Вахтангова театра актёр волаш, Б. Щукина театральни института исбахьален кулгалхо волаш. ТӀом хьайнача хана, из 19 шу даьнна хиннав, тӀема талмачий ишкол яьккхай цо Ставрополе, цул тӀехьагӀа тӀемаш деш хиннав Ростове, гӀаьбартой-балкхарой, хӀирий мехкашка, хӀаьта моастагӀа МагӀалбика гаргагӀертача хана, гӀалгӀай шахьар лораеш хиннав. Лейтенант волаш, чакхбаьннаб цунна тӀом. Кино ловза из волавенна укх шера 70 шу дуз. Цун хьалхара фильм хиннад «Адмирал Ушаков».

Этуш кхозза саг йоалаяь хиннав, хьалхара шиъ актрисаш хиннай, кхоалагӀъяр — ингалсий метта хьехархо. Ваьхав Москверча Гранатови урам тӀа. Е. Вахтангова а М. Ермоловай а театрашка бе-беча спектаклашта юкъе цо ловзаяьй 50 совгӀа юхь, радиоспектаклашка, телеспектаклашка — 36, кинофильмашка — 38. Иштта цо йовхьамаш ловзаяьй «Фитиль», «Ералаш» яхача журналашка, кх. дӀ. Россе «Аэрофлота» цхьа самолёт я Этуш Владимира цӀи лелаеш. ХӀаьта соахка цун сурт тӀадолаш араяьннай почташа лелаю марка.

Дукха а тайп-тайпара а паччахьалкхен совгӀаташ денна хиннад Этуша, царех я ЦӀеча Седкъан орден, «Даьймехка хьалха карагӀдаьннарех» яхача ордена бизза мугӀ (йиъ орден), СССР халкъа артист яха цӀи, Паччахьалкхен преми. Къаьстта а белгалдаккха лов, Владимир Абрамовича совгӀаташта юкъе ГӀалгӀай мехка эггара лакхагӀдола совгӀат «КарагӀдаьннарех» яха орден (2003), «Кавказ лораярах» яха медаль хилар. Цо моастагӀчох лораяьча МагӀалбике цхьа урам ба цун цӀи лелаеш. Деррига цунна мел денна совгӀаташ а еза цӀераш а геттара дукха я, ерригаш йийца варгвац.

Ший дезалех цун цхьа йоӀ Раиса мара хиннаяц, из а актриса хиннай. ЙоӀ а йиӀий-воӀ а Америке бах.

Кхелхав Владимир Абрамович 2019 шера бекарга бетта 9-ча дийнахьа, ший 96 шу даьннача хана.