Ашарашта хетадаь вахар
ГIалгIай дирижёра 80 шу дизад
Дукха артисташ, иллиалархой бовза а, царца гIулакх доагIаш хила а ираз хиннад са айса вахаш яьккхача хана. Масала, Хамхой Элмарзий Ахьмадаца кхаь шера болх баьб, ерригача республике гIолла гобаьккхаб цунца, нохчашкахьара хьалволавенна гIалгIай йистошка кхаччалца, Инаркъанаькъан Мадинас лелаяьча хоре илли оалаш хиннав, школе дешаш волаш, Дагаев Валидаца цхьан сцена тIара байташ йийшай, Йовлой Раяйца, Меданаькъан Мустафайца кхоачара саг санна хьакхашта къамаьл де йиш йолаш вар, дукхаза вIашагIкхетараш хиннад Хамхой Борисаца, кхы а массагIа ва уж. Кхыметтел Лоза Юрегара интервью ийцай. Бакъда тахан са дагайоха безам ба вай къаман цаI мара йоаца профессиональни дирижёр Янданаькъан Мухьмада Мадинат. Чакхдоалача шера цун 80 шу дизад. Амма из йовзача сага цIаккха лургьяц цунна из ха, хIана аьлча даим елаенна, хьинар долаш, вахарцара безам ди тIехьа совбувлаш, йолаялара а дувцача къамаьла а, тIах аьнна, саг я из.
Мухьмада Мадинат сона йовза дукха ха я. Цу хана из балха яр Шолжа-ГIалий тIарча ашарий училище. Из а цига мел бола гIалгIай а бовзар сона студент волаш а, цул тIехьагIа газета редакце балха волаш а. Цига дешаш яр Ахценаькъан Хадижат, эггара хьалха цох «Сердало» газета тIа яздаьр со вар, вай къаманна из дIайовзар дезаш. Цига деша багIар гIалгIай мехкарий Тутайнаькъан Тамара (парте Наьсарен райкома кхоалагIа секретарь хиннача Iамархана йоI), МутаIаланаькъан Хадижат, къаьстта а хьоашал тоссаденнадар са вокал хьехаш хиннача Меданаькъан Альбертаца а Янданаькъан Мадинатаца а. Аз доаккхал дора, уж цу тайпара дешар хьехача моттиге балха хиларах. Балха отта меттел, деша отта а хала долаш моттиг яр из.
Янданаькъан Мадинатаца са тайп-тайпара вIашагIкхетараш хиннад. Шолжа-ГIалий тIа волаш, дукха а хоза а сурташ деннадар цо сона. Цу хана из Нохч-ГIалгIай симфонически оркестра шоллагIа дирижёр яр. Царех цхьадарашта кепа тоха кхийнадар са газета тIа, бакъда цхьадараш кепа ца тохаш а дисадар. Са-сайдараш а уж а Шолжа-ГIалий тIара Iаьдал хувцаделча, цIагIара дIадихьа, дайра. Цигара вахар юхамаччахьдаьнначул тIехьагIа, Мадинат дуккхача дунен миIингашка хиннай, къаьстта белгалдаккха лов цо Бразиле а Парагвае а симфонически ашарий концерташ денна хилар. ХIаьта Парагвае цо хьайийлла хиннай ший доалахьара ашарий Академи. Иштта цо болх баьб Ростоверча симфонически оркестраца, кхыйолча ашарий коллективашца.
Сона къаьстта кхаъ хул Мадинат Магасерча автобуса чу бIаргаяйча, кура-сонта йоацаш, нах дукха безаш саг я из хьалха санна, цунца къамаьл деча хана цхьа ший тайпара йIовхал а къаманцара безам а хоалу. Наьна мотт ховш, из бувца эхь ца хеташ, я Мадинат. Арахьа ца соцаш, ший Даьймехка цIаена, цун керттерча шахьар тIа яхаш я дирижёр, цо а хьагойт, ший къаманца доаца ираз лехаш из йоацилга. Сога хаьттача, из чIоаггIа лоархIаме да моллагIча сага вахаре.
Мадината сурт да мотташ, цхьан газето ший оагIонаш тIа кепа техаяр хIирий дирижёра Дударова Вероникай суртá. Сона, бакъдар аьлча, из чIоагIа новкъа хилар, хIана аьлча Мухьмада Мадинат санна бола нах, цар гIулакхаш дайза ца Iеш, юхь тIара бовзаш хила деза вай, Базорканаькъан Идрис, Янданаькъан Жамалда, Оздой Мурад, Къоастой Ширвани, Малсаганаькъан Ахьмад, кхы а дуккхабараш санна.
Мадинат дунен чу маьрша, могаш, ираз долаш яхар ловш, чакхдаккха безам ба са ер лоаца йоазув.
