Инарала 80 шу дизад
Султиганаькъан Асхьаба Мухьмад ваь ди дагалаьца
Укх деношка 80 шу дизад гIалгIашта юкъе шерра вовзаш волча инарал-лейтенанта Cултиганаькъан Асхьаба Мухьмада. Из ваь хиннав 1944 шера саькура бетта 28-ча дийнахьа. Из фу ди да, дувца ца дезаш, дика ховш да зIамигачунна а воккхачунна а, хIана аьлча къаман вахаре эггара IаьржагIдола ди хиннад вай мохк бохабаьр, вай Сибре дигар. Цу дийнахьа ваь Асхьаба Мухьмад дийна висар а тамаш йолаш гIайгIа, сагото хиннай гIалгIашта тIаэттар. ХIаьта а Даьла кара да шедар, из цу халача дийнахьа ваха а ший къаман яхь лелаеш, цун сий доаккхаш дIаваха а кхелла хиннав.
Лоацца дагалоацаргба вай цо хьабена вахара а къахьегама а никъ. Мехкахбаьхачул тIехьагIа, хьабаьнна моттиг Яндаре йола цар дезал баьхаб Казахстана Павлодарски областе. ЦIадаьхкачул тIехьагIа юкъера ишкол а яьккха, Оренбургерча артиллерийски училище эттав из, цул тIехьагIа чакхъяьккхай ПВО гIашлой-тIемхой маршала А. М. Василевске цIерагIа тIема академи. Асхьаба Мухьмад Венгре лаьттача зенитно-ракетни полка керте хиннав, цул тIехьагIа цу тайпарча бригаданна кулгал даьд цо, дIахо Хмельницке областерча гарнизона хьакимал леладаьд. Танкай эскара ПВО командующи, Туркестанерча тIема куран эскара ПВОна керте лаьттав. Из цига къахьегаш волча хана, лоалах дахача шин къаманна (хIираштеи гIалгIаштеи) юкъе тIом хилар. Советски Союза эскарашка амал деш хинна дукха эпсараш цIабаьхкар цу хана, шоай къаман оагIув хьаллаца, эшаш дола гIо де. Царех бар инаралаш Овшанаькъан Руслан, ЦIечой Муса, Султиганаькъан Мухьмад, полковникаш Пхьилекъонгий Руслан, Темарханаькъан Ювсап, ЦIокъанаькъан Хьамзат, Овшанакъан Башир, кхыбараш.
Къаман хьалхара президент хьахаржалцца йолча юкъа, хан йолча гIалгIай администрацена керте лаьттар Султиганаькъан Мухьмад. Фусамех, балхах, вахарах беха лелача эзараш болча наьха гIулакх аттача даккха гIерташ, ди-бийса ца къовсаш, тайп-тайпарча цхьанкхетарашка дакъа лоацаш, кхетаченаш чакхйоахаш, федеральни Iаьдала хьакимашца, гонахьарча республикай викалашца бувзаме вувлаш, къахьийгар цо. Цу хана цунца вIашагIкхетар а къамаьл а хилар са, Наьсарен газета болхлочун санна. Цига хиннача къамаьла а сайна дайнача-хезача хIамай а кIийлен тIа, цу халача деношка «Инарал Султыгов» яха статья язйир аз газета лаьрхIа, цунна кепа а техар.
Сона цох хийтар кура-сонта воацаш, кIоаргга хьаькъал а сабар а долаш вола саг. Иштта ца хилча, цхьан эрсий илле яхача беса, инаралга а кхоачалургвацар. Сатохаш, хало ловш, моллагIа хIама кхетамца деш хила веза цу новкъа ваьнна саг. Ишттачарех хиннав вай цIихеза мехкахо а.
Республикан президент хьахержачул тIехьагIа, Асхьаба Мухьмад къахьегаш хиннав гIашлой эскара ПВО академе кулгалхочун гIонча, Къулбехьен федеральни куран керттера инспектор волаш.
Къаьстта а белаглдаккха лов, ший даь никъ хержа хьавена цун воI Руслан а Россе танкай эскара инарал хилар.
Асхьаба Мухьмад могаш-маьрша а волаш, дуккхача хана вахар ловш, чакхдаккха безам са цох дола сай лоаца дувцар.
