Редакцен болхлошта юкъе хьалхарча мугӀарагӀа вагӀа гӀорваьнна йоазанхо Базорканаькъан Идрис. Цу хана из Шолжа-ГӀалий тӀа ваьхачох тара да. Сона ховчох, цига цунна енна хиннаяр цхьа цӀа дола квартира. Редакце из хоашалгӀа варах нийсденнад укх сурта кхолладалар, из даьккхар, хетаргахьа аьлча, Пхьилекъонгий Идрис хиннав, из вар газета фотокорреспондент. Идриса аьтта оагӀорахьа вагӀа вай къаьнагӀчарех цаӀ хинна журналист Чахкенаькъан Ювсап. Итташ шерашка цу редакце болх беш хилар Ювсап.

1976 шера аз язъяь «Комсомольцаш» яха стихотворени эггара хьалха республикан газета оагӀонаш тӀа кепа техар а ТӀегала Ювсап вар. Идриса аьрда оагӀорахьа вагӀар ва журналист-таржамхо хинна Пхьилекъонгий Аьдалгире Ахьмад. Цунца болх бе бийзаб са а. 1981 шера редакце со балха вахача хана, изи Лаьнанаькъан Мустафаи газета таржамхой болх беш бар. Хьалхарча мугӀар тӀа цунна йисте вагӀар ва Галай Хьасан. Цо къахьийгад «Сердало» газета редакце, Нохч-ГӀалгӀай радион керттера редактор, Нохч-ГӀалгӀай книжни издательствон директор волаш. ТӀехьашка уралаттараш берригаш бовза г1ерташ, вай къаьнаг1бола журналисташ Шеденаькъан Султан, Ц1олой Руслан оарцаг1баьхабар аз. Аьрдехьа йисте латтар Котанаькъан СаӀадала Султангири ва.

Из, со цига балха волча хана, газета бехктокхаме секретарь а юхьанцарча партийни организаце секретарь а вар.

Республика хьаяьчул тӀехьагӀа, ше валлалца, Халкъа Гуллама таржамхо волаш къахьийгар цо. Цу заман чухь тӀаийдаь законаш, цо таржам даь, гӀалгӀай меттала даьха да. Цунна юххе латтар я Ужахьанаькъан Тамара. Со университете дешаш волаш (1975-1980), философи хьехаш яр из тхона, студенташта дукха а езар.

КхоалагӀа, велаш, латтар Маькенаькъан Абукара Асхьаб ва. Цул магӀахьа латтар — Хамхой Мустафа, тӀаккха — Мархенаькъан Роза. Цу мугӀар тӀа тӀеххьарвар Ӏоахарганаькъан Мухьмад ва. Каьхата тӀа цхьа хӀама дӀа ца яздеш, машинистканна юххе дӀа а этте, дӀаьха йоазув цунга дагахьа кепа а тохийте дӀаводар, оалаш хезад сона цох. Хьисап долаш, хӀамах дика кхеташ, хьаькъал долаш журналист хиннав из.

Базорканаькъан Идрис Буро тӀа вахача хана а вар, редакце хьоашалгӀа воагӀаш. Газет Шолжа-ГӀалий тӀарча кепайоазон цӀагӀа дар цу хана. 1983-гӀа шу дар мотт сона из.

Культуран отделе болх баьчул тӀехьагӀа, сох воккхагӀвола корреспондент ваьвар, сай хьалха хиннача декхарел совгӀа, керттерча редактора тӀадехка декхараш кхоачашду болхло а хиннавар сох. Цхьан дийнахьа керттерча редактора заместитель волча Хамхой Мустафас дӀачувийхар со.

— Тахан редакце хьоашалгӀа воагӀаш ва Базорканаькъан Идрис, дӀадухьалвахе, из со волча хьалчувоалавелахь, — аьлар цо.

Йиллача хана, кепайоазон цӀен лохерча лагӀаш тӀа, хьежа дӀаэттар со. Сона хеташ, цу кепайоазон цӀагӀа эггара хьалха воагӀаш вар Идрис, Буро тӀа ваха дӀавахачул тӀехьагӀа. Дукха латта везанзар маьлха кӀалха. Ахкан ха яр мотташ ва со из, садикъа а йӀайха а яр ара. ХӀаьта Идрис а лоацо пхьош дола йиткъа коч ювхаш вар.

Машен хьатӀаена, чура Ӏоваьлар лакхарча дегӀара а куц долаш а хинна йоазанхо.

Бакъда из цаӀ вацар, цунца яр фусам-нана Цисканаькъан Аза а. Моаршал а хаьтта, се дӀавовзийта, чубигар аз хьаьший. Лифтаца 6-ча гӀата тӀа хьалтӀадаьлча, фусам-да санна со хьалхаваьлча бакъахьа хеташ хилар Идрис. Эггара хьалха со, тӀаккха Идрис, цун тӀехьа Аза лифта чура арадоладелар тхо. Идрис наӀарашта юкъекхоаччашехь а, уж дӀакъовлаелар, хьаьшан аьтта пхьарса хьаркхинг лозаеш. Цига Азас кулгаца массаж а яь, Ӏочудахар тхо редактора заместитель волча. Цу хана цхьабараш отпусках болаш, вожаш командировке баха, кхо-виъ саг мара висавацар редакце. Из бахьан долаш, тхо гулдаь, йоазанхочунца къамаьл хиланзар, сурт а даккханзар. Бакъда сона чӀоагӀа ловра, Идриса юхе вагӀаш сурт даккха. Цул тӀехьагӀа кхы редакце ванзар деша говзанча, аз цига болх беш мел яьккхача хана.