«Лоаман Ӏуйре» яха альманахи сои цхьан ханара дар, тхо шаккхе даь хиннад 1958 шера. Бакъда тхо даь моттигаш бе-бе я. Со Казахстане ваьв, цу хана тха дезал цӀабахканза хиннаб, хӀаьта альманах дукха ха йоацаш меттаоттаяьча Нохч-ГӀалгӀай Республике даь хиннад. Дийна биса, шоай мехкабаьннача гӀалгӀай йоазанхошта мукъа беннаб из хьаде, хӀаьта нохчий йоазанхоша хьадаь хиннад «Орга». Республикан йоазанхой доалахьа хиннад литературно-исбахьален, юкъарлен-политически альманах.

Дуккха йоазанхошта дегӀабахка, шоаш наха дӀабовзийта гӀо даь хиннад цо. Масала, цун оагӀонашка гӀолла яйзай гӀалгӀашта Албаканаькъан Жабраила байташ, Чахкенаькъан СаӀида «Дошо бӀоагӀий» яха роман, Тимарзанаькъан Башира поэзи, кхыдола вай йоазанхой кхолламаш а цӀераш а.

«Лоаман Ӏуйре» къаман дезаденна альманах дар. Цу хана хьаяздора, дешар, керда гучабаьнна поэташ, драматургаш, критикаш, прозаикаш бовзар цунга гӀолла. Сий долаш а дар альманах. ХӀара шера изи «Сердало» газети хьаяздора вӀалла дийша йоацаш хиннача тха нанас, ше «Электроинструмент» заводе балха йолча заман чухь. Цудухьа, зӀамига волча хана денз, из газет а альманах а дезаденна вар со. Цу тӀа яр тайп-тайпара рубрикаш: «Поэзи», «Проза», «Литературоведени», «Вай — интернационалисташ», «Исторе оагӀонаш», «Муш — бӀаьха, дош — лоаца», иштта кхыяраш. Тайп-тайпарча ханашка цун керттера редактораш хиннабар Чахкенаькъан СаӀид, Боканаькъан Ахьмад, Ведажанаькъан Ахьмад, Вешкаранаькъан Мухьмад, Малсаганаькъан Або. ЛаьрххӀа вӀашагӀъелла редколлеги а яр журнала, цунна юкъебоагӀаш хиннабар дош говзагӀа ала ховш хинна йоазанхой, лакхе хьоахабаьрел совгӀа Гаьгенаькъан Гирихан, Пхьилекъонгий Махьмад-СаӀид, Шаденаькъан Султан, иштта кхыбараш.

Хоза мужалт яр альманаха, цу тӀа дар хьалбоалаш латтача маьлха хьалхашка гораэтта лийг. Тираж ши эзар совгӀа яр, цкъаза из дӀакхоачар, дукха хӀама ца эшаш, кхаь эзарга. Вешкаранаькъан Мухьмад редакторалла хьатӀавеча, формат а журнала цӀи а хувцаелар, «Маьтлоам» аьнна цӀи тиллар цох. Карарча хана цох хьахиннад «Литературни ГӀалгӀайче» яха журнал.