Ноаноша, тӀом боацаш, шоай къонгаш маьрша-могаш хиларга сатувс; кагийча наха шоаш тарлургбола мехкарий корабарга, дезал кхолларга догдоах; бер доацачо бер хиларга, кер доацачо кер хиларга, цӀа доацачо цӀа хиларга, машен йоацачо машен эцарга, могаш воацачо дарба хиларга сатувс. Кхы а массагӀа хӀама хул вахаре эшаш а хилча бакъахьа хеташ а. Масала, хьехархочоа дика хетаргдар ший дешархоша Ӏилмаш Ӏомадара гӀулакха тӀа доккхий толамаш даьхача; ахархочоа – ший кхашка нах цецбоалаш ялат хилча; бокъонаш лораерашта – цхьаккха зулам а из хьадеш бола нах а вайна юкъе ца хилча. Кхы а дӀабӀаьхбе мегаргбар из мугӀ.

Журналисташ болча укх деношка беза хьаьший ух. Царех бар газета редакце баьхка ГӀор-Дадии Лаьлиги. Уж, гӀадбаха, тӀаийцар фусам-даьша, цӀаькха гуш хилар, керда шу гарга а гӀерташ, къаьнадар чакхдоалаш латтилга. КӀай модж йолча воккхача сагага а цун бочача новкъостага а даим хулаш дола совгӀатий гали дар. Вешта аьлча, даьссача кулгашца баьхкабацар уж къаман керттерча газета болхлой кердача шерца даькъала бувца. Цхьаннена сахьат делар, вокханна книжка, кхоалагӀчунна пхьегӀаш, иштта кхы дӀахо а. Мерзача хӀаманца чай молаш а баьгӀа, газета болхлошца сурташ а даьха, дӀабахар хьаьший.

Кхы а дукхача моттигашка гӀолла чакхбала безар цар, керда шу тӀадар дездеш, наха ловцаш доахаш, совгӀаташ телаш. Цар из кхувргда аьнна хет сона, хӀана аьлча говра соалозаца а боацаш, эггара массагӀйолча вай заман машинаца бар редакце хьаьший. Маьрша гӀолба уж, царга хьежаш да дукха адам.