«Фабрика» оалача базар тӀа хьайийллар Нинай тика, Ужахьанаькъан Мухьмада книжаш дохка дукха йоккха йоаца тика. Ха дӀа мел йода дукхагӀа хулаш йоагӀар уж. Карарча хана уж массехк я Наьсаре, Магасе, кхыйолча моттигашка. Дукха ха йоацаш цу тайпара тика хьахиннай «Артис Плаза» яхача Магасерча гостиницан №2 йолча корпусе. Из я Наьсарерча «Карона» яхача цӀагӀарча «Букидея» яхача тикан филиал. Наьсаре массехк шу хьалха из тика хьайийллар хиннай Пхьарчанаькъан Роза. ХӀанз цун филиала чу Магасе къахьегаш кхо саг ва, царех цаӀ я тха къамаьл хинна ТӀоаршхой Танзила. Кхы а ши новкъост я цунца болх беш; Макка, Зарема тхо цига нийсденнача дийнахьа балха бацар.

- БоагӀий нах, ийдой книжкаш? – хетт аз Танзилайга.

- БоагӀа, книжкаш а ийду.

- Фу тайпа книжкаш хетт дукхагӀа? – тахка лайра сона.

- Исбахьален книжкаш, психологеца дувзаденна литература каст-каста хетт, - йоах Танзилас.

Тикага цхьа зал мара яц, хӀаьта а цу чу тарденнад тайп-тайпара чулоацам бола книжкаш, царех да исбахьален литература. Хоза арадаьха, бӀарг тӀаозаш да Достовеский Фёдора «Карамазовар вежарий», Шекспир Вильяма трагедеш, Гоголь Николая «Дайна синош», Пушкин Александра «Капитана йоӀ», дерригаш дийца варгвац. Иштта кердача тика чу да Ӏилманца, политикаца, доазол арахьарча классикаца, гӀалгӀай меттаца дувзаденна книжкаш. ТӀеххьардараш дукхагӀча даькъе мотт Ӏомабеш доагӀача берашта лаьрхӀа да. ГӀалгӀай боккхагӀча йоазанхой книжкаш ма хулла дукхагӀа цу чу хилар ловра. Хетаргахьа, уж кӀезига хилар дувзаденна да, уж кӀезига арадувлаш хиларца.

Литература дукха дезаш волча сага товр хургда аьнна хет сона, цу тика чу нийсвелча, книжкаш дика хиларал совгӀа, маьхаш а сов лакха дац цар. Масала, литература дезаш волча сага хоза арадаьккхача Куприна книжканна кходергдац 300-400 сом. Цул совгӀа, совгӀата дала мегаргдолаш, лоархӀаме а лакхача боарам тӀа яздаь а книжкаш да тика чу дохкараш.

Белгалдаккха деза, ювцача тика чура эца йиш я, дешархошта ишколе эшаргдола кхыдола хӀамаш.