Къаьстта а белгалбаха беза Сийлахь-боккхача Даьймехка тӀема юкъе дакъа лоацаш хиннараш: Ӏоахарганаькъан Рашид-Бек, Оздой Мурад, Малсаганаькъан Ахьмад, Къоастой Ширвани, Ӏарчакханаькъан Хасолта, кхыбараш. Цар вахар маьршача хана хулача итт вахара нийса лархӀа мегаргдолаш да, хӀана аьлча машар болча хана гургйоаца кхераме моттигаш иттаза а бӀаьзза а дукхагӀа яйна нах хиннаб уж, хӀара дийнахьа, хӀара сахьата Ӏоажала юхе лийннаб майрахой, кхоанара ди шоашта доагӀаргдий ца ховш. Иштта майрал езаш хиннай цу балха тӀом боацача заман чухь а, тӀема лётчикаш болаш, шоай декхар тӀехдика кхоачашдеш хиннаб Пхьилекъонгий-Юртара Осканаькъан Сулумбик, Сурхо тӀара ЦӀечой Мухьмад. Миг яхача эггара массагӀйолча самолёташта доал де Ӏема хиннаб уж. Царга шоашка санна хало а сагото а кхоач аьнна хет сона цар дезалашка а, уж цӀагӀа боацаш, сигала болча хана. Со зӀамига кӀаьнк волаш, Аьлтий-Юртарча Малсаганаькъан дувцаш хезад сона укх тайпара хӀама. Сийлахь-боккха Даьймехка тӀом болча хана, моастагӀий самолёташ Наьсаренга а хьакхоачаш хиннай, бомбаш чуеттар духьа. Цу хана, уж сигала гучаяьлча, Малсаганаькъан Татархан коа араваьле, сигала урагӀахьежа отташ хиннав, мьлха духьала кулг а лувцаш.

— Хьавала, дӀатаба, моастагӀа ва из, — аьлча а юхавоалаш хиннавац къоано.

— Сабардел, вай кӀаьнк вий хьожаргвар со царца, — оалаш хиннад йоах цо. Сагото хиннай цунга ший воӀах. Иштта кхелла да даь, наьна дог.

Укх шера 100 шу дуз, Галашка баьхача Къоастой Устархана дезале Ширвани ваь хиннача хана денз. ТӀема хана майра лётчик волаш чакхваьннача цун, моастагӀа эшаваь цӀавийрзачул тӀехьагӀа а 22 шу мара даьнна хиннадац. ДӀахо керда хьаяь самолёташ тешаме йий хьожаш, уж сигала кхувлаш къахьийгад цо Рига оалача Прибалтикерча шахьар тӀа. ХӀаьта самолёт чуежа леча хана а хиннавац из 26 шу даьнна мара. Цунна а, Малсаганаькъан Ахьмада а, Оздой Мурада а Россе Турпал яха еза цӀи елар паччахь хиннача Ельцин Борис Николаевича.

Тайп-тайпара йоазош дийшад аз цох лаьца книжкаш тӀара а интернет чура а. Цхьаннахьа хьоахадаьдац из дезал болаш хиннав леча хана е хиннавац, саг йоалаяь хиннавий а хац царга гӀолла. Иттех-пхийттех шу хьалха Останкино оалача телевидене 1-ча каналах хьахьокхача цхьан передачага хьожаш вагӀар со.

Цу чу хьахьокхаш дар Прибалтике яхаш хиннача тӀема доакъашхочох, эрсий кхалсагах дола документальни фильм, хӀанз къаьна йоккха саг яр из. Цо, доаржадаь, истола тӀа Ӏодаьхкача сурташта юкъе дар дуккхаза сона бӀаргадайна вай мехкахочун Къоастой Ширване сурт. Хетаргахьа, цунца болх баь, из вовзаш, саг яр из. Хьанна хов, вайна ца ховш, из саг йоалаяь хиннавий а. Сона хеташ, цун вахарцара тахка езаш моттиг я, аьнна, хет сона из. Музея болхлоша а журналисташа а теркам тӀабахийта мегаргболаш хӀама да из, сога хаьттача. Хьанна хов, вай мехкахочун вахарцара керда оагӀув гучайоале а.