Кхийра нана йийлхаяц
КхувшбоагӀарашта доал эшарах лаьца
Тахан вайна юкъе дукха нийслу тамашийна хӀамаш. Башха саг цецвала везаш а хилац, аьнна, хеталу; хӀана аьлча хӀара дийнахьа яхар мо, уж вайна гуш хиларах. Масала, кагирхой тахан массе оагӀорахьара хьаллоацаш, царна никъ хьабеллаш, Ӏаьдало царна даим терко лоаттаеш ха я ер. Бакъда цхьаболча кагирхоша из башха теркал а дой-хьогӀ, аьнна, хеталу; цар леладечунга хьежача. Берригаш ба аргдац аз, бакъда цхьабараш, хӀаман хьурмат ца деш, шоай вахаре нийслуш дола дикаш иштта массаза хургдолаш санна хеташ, нахаца лерхӀам боацаш хьалкхувш хилар-м, ма-дарра аьлча, нийса дац. Таханарча тӀехьенца, къаьстта кхувшбоагӀарашца, дукха ба сарахьа машенаш хехка ара а баьле, саг дӀаваха а е хьава а ца вуташ, ша баьча наькъ тӀа уж кхестаеш, зехьа ха йоаераш. ЧӀоагӀа хатта ловш хул со царга, малагӀча ахчах ийцай Ӏа из, аьнна. Ховш ма дий из-м, ше къахьийгача рузкъах из ийцайоацилга. ТӀаккха дас е нанас даьккхача ахчах из ийцаяле, селлара харцахьа кхестае еза из? Цул а халагӀа деций, вӀалла бехк боацача сага тӀатеха, цар из лозавича?
Цхьан сайрийна тхоаш дахача урам тӀа дайра сона укх тайпара сурт.
Ма хулла сиха машен лехкаш, шаьрача наькъ тӀагӀолла из кхестаеш, вар цхьа берашха зӀамига саг, цунна тӀехьатовсабенна болхар юртара кӀаьнкаш а, царна юкъе геттара зӀамигбараш а бар. Бакъда машена дас, уж вӀалла боацаш санна, теркал ца беш, ший машен кхестаеш, цунга цӀогӀа ухийташ, машена чархех кӀур тувсийташ, харцонаш лелайора. ЦӀаьхха, юхасеца, цу машено катехача, Дала ма дахьалда, цун кӀалдаха тарлуций царех бер? ТӀаккха малав цунна хьалхара жоп дала дезар? ЮхьӀаьрж оттараш цун да-нана деций? Иштта, хьисап доацаш, бола кхувш боагӀа вай кӀаьнкаш бӀаргабайча хала хет сона а са мугӀарерчарна а, оалалургдар сога.
ДукхагӀйола мукъа ха цхьацца цӀагӀа эшаш дола гӀулакхаш деш, е кинижкаш дешаш, е кхыдола вахарера хьашташ кхоачашдеш цар дӀахьош хилча, шоашта а иштта даьна-нанна а паргӀато лургьяр цар, вахаре царна из дукхагӀа накъадаргдар. Оалаш да-кх вай даьша: «Юстара лийнначох йис кхийттай», — аьле. Цох тарра, уж ха яхача хана ара ца лелийта даь е наьна низ дӀакхачар-м геттара хьинар а говзал эшаш хӀама дац. Цу дешага хьежа беза уж, хӀана аьлча таханарча дийнахьа вайна дукха гу харцахьа лелаш, тайп-тайпара молхаш багатувсаш, геттара ийрчача наькъ тӀа баьнна кагирхой.
Берригаш беце а, ба-м ба уж вайна юкъе. Хьаштдале малашб ховш а ба, бакъда хӀаравар шийгара ца ала гӀерташ, царна сатохаш ва, уж шоай аргӀагӀа дас е нанас кхетабергбарий-хьогӀ, яхаш. Из мо бола никъ хьаэца атта хул, бийсан ший ханнахьа чу ца воагӀаш, ара лелачунна. Водар хьаэцара тӀера хул, айлаюкъе лелаш бараш.
Уж дӀа хьанах кхет, гонахьара гӀоз малагӀа ба ха деза даьшта. Ший дезалхо лоравеш хила веза саг, кхоана велха везаргвац цох тӀаккха. Цудухьа хила вай кӀеззига хӀаман хьисап долаш!
