Вай мехкахочун керда книжка
Малсаганаькъан Iайшета дагалоацамаш
ДIадаха 2023 шу чакхдоалаш, вай республике кхаьчар Санкт-Петербургерча «Четыре» яхача издательствос кепа теха арадаьккха «ХIанзарча литературан бесаш» яха книжка. Кхо эзар арадаьнна книжка латт 26 йоазанхочо кхеллача прозахи поэзехи. Тайп-тайпарча къамех болча наха юкъе я Бернгардт Артёма, Богатырёв Александра, Веремеенко Светланай, Выборнов Юре, Громогласов Александра, Коньшина Евгенияй, Корнева Екатеринай, Лазебная Людмилай, Ларин Игора, Попова Светланай, Тарасова Валентинай, Черникова Светланай, Шульгина Иринай байташ; Гелхвидзе Самсона, Голубева Екатеринай, Гортинская Лидияй, Дорошкевич Натальяй, Маликов Виктора, Орлова Светланай, Парипская Софияй, Рудковский Михаила, Самошкина Натальяй, Щербинина Еленай проза.
Къаьстта а дикахетар хул, цунна юкъедаха Малсаганаькъан Iайшета йоазув бIаргадайча. Шоана из дикагIа йовзийтар духьа, массехк дош аргда вай йоазанхочох лаьца. Iайшет ше тайпан Чехканаькъан я. Из яь хиннай 1956 шера, вай къам Сибре дигача хана. Малсаганаькъан тайпан цIи цо лелаяра бахьан да, вайна массанена вовзаш волча гIалгIай драматурга Малсаганаькъан АртагIа Оарцхой нус из хилар. Оарцхой Ахьмада фусам-нана яр Iайшет. Карарча хана, Ахьмад ше воацаш ва, бакъда Нохч-ГIалгIай университете дешаш хиннача кагийча наха а мехкарашта а дика дагавоагIа эрсий халкъа багахбувцам хьехаш хинна университета доцент, тIехьагIо профессор яха еза цIи лу цунна.
Дувцача книжканна юкъедахад Iайшета яздаь, вай а кхыдола а къамаш Сибре дигарах дола дагалоацамаш. Уж диъ даькъа дийкъа да» 1. «Казахстане Iобигар (1944 шера саькура бутт – 1957 шера наджгоанцхой бутт)»; 2. «Малсаганаькъан Оарцхой Ахьмда дагалоацамаш (1932 шера наджгоанцхой бетта 2-гIа ди – 1993 шера оагIой бетта 19-гIа ди)»; 3. Оарцхой йиIий Малсаганаькъан Азай дагалоацамаш (1923 шера аьтинга бетта 9 -гIа ди – 2011 шера кIимарса бетта 5-гIа ди)»; 4. «Оарцхой йиIий Малсаганаькъан-Озанаькъан Зарай дагалоацамаш (1928 шера лайчилла бетта 18-гIа ди – 2016 шера наджгоанцхой бетта 26-гIа ди)».
Очерка тIа дувцар да; артиллере училище яьккха, паччахьа эскаре лаьтта, Граждански тIема турпал хиннача Малсаганаькъан АртагIа Оарцхой дезал мехкара ара мишта баьха хиннаб.
ХIана тиллай книжках иштта цIи. Вай вахар тайп-тайпарча бесаех латташ да, хIара сага дукхагIа е кIезигагIа безаш бос хул, царех цхьанне дегагIоз яхь цунна, воккхо – сагото, кхоалагIчо – дог айду, биълагIчо – уйлаш сомайоах, кхы а дукха дувца йиш яр царех. ХIаьта литература а, ший тайп-тайпара чулоацам болча йоазошца, вахара бесаш да. Цу тIара хьадоагIаш да, дувцача книжках иштта цIи тиллара бахьан. Аз лакхе ма аллара, хIара сага ше-ший бос ба. Малсаганаькъан Iайшета ший ба аьнна белгалбаьккхаб баьде-цIе бос. Цунца дувзаду цо хьинар, дIадоладаь хIама чакхдаккха гIертар, барт, гаргалол, вахарцара безам, дега хозал, диста боарам боаца сага денал.
Iайшет карарча хана хьехархочун болх беш я, Наьсарерча политехнически колледже, яхаш Магасе я.
«ХIанзарча литературан бесаш» яха книжка оттадаьр – Алексия Сандрин.
