Тамаш кхоллаш вола дахчан пхьар
Музее гойташ да цун балхаш
Укх деношка мохк тохкаш йолча Малсаганаькъан Тухана цӀерагӀча ГӀалгӀай паччахьалкхен музее болх бе болабелар дахчах тамашийна хоза хӀамаш хьаеш волча Пхьиденаькъан Ахьмада Адама кхолламца бувзабенна гойтам. Ала деза, дахчах хӀамаш хьае ховш бола нах вай къаман хиннаб ширача заман чухьа денз. Укхаза дагадох цхьа шира гӀалгӀай дувцар. Цо йоах, беррига гӀалгӀай хьабаьннаб кхаь вешех, царех цаӀ, вежарий бувбоалача хана, ваха хайнав хьун юхе, хӀана аьлча из хиннав дахчан пхьегӀаш хьаеш. Тахан Яндаре вахаш вола Адам а вай ширача даьша леладаь пхьоал дӀахо дӀахьош, къаман говзанчий гӀулакх дийна лоаттадеш хьавоагӀа.
Дукха нах гулбелар цу дийнахьа музея тхов кӀалха, царна юкъе бар ГӀалгӀайчен пхьарий цхьанкхетара викалаш, Ӏоахарганаькъан ЧхьагӀа цӀерагӀча Ӏилма-тохкама института болхлой, Жайрахьарча-Эса-ЧӀожерча лораеш йолча Ӏалама музея къахьегамхой, Наьсарерча исбахьален ишколан хьехархой а дешархой а, мехка тохкамхой, студенташ, Наьсарерча № 2 йолча юкъерча школан дешархой.
Гойтам кийчбеш къахьийгача музея Ӏилман болхлочо Дзейтанаькъан Жаннас, вӀашагӀкхетар хьаделлаш, белгалдаьккхар:
— Тахан вай дерригаш вӀашагӀкхийттад Пхьиденаькъан Ахьмада Адама аргӀанарча гойтамга хьажа. Сакхетамера саг, ше хьахилча денз, хозача хӀаманга кхача гӀерташ хьавенав. Цо из кхоачаваьв Ӏалама бийдалах цецваллал хоза хӀамаш кхолларга. Пхьиденаькъан Адама балхаш хьалхара гойташ дац мохк тохкаш йолча музея фусамашка. Цун балхаш телевиденерча передачашка гӀолла а довзийташ хиннад вай мехка бахаш болча нахá. ХӀара къаман ший тамагӀа да дахчах хӀамаш хьаеча балха тӀа пайда эцаш, ший говзалаш а наькъаш а да. Тахан музее хьабеллача дахчах хӀамаш еча Пхьиденаькъан Адама декоративни-прикладной гойтама цӀи я «Говзанчий тӀехьале» яхаш.
ДӀахо къамьл дир музея директора Саганаькъан Мухьмада, Пхьиденаькъан Адама, Ӏилма-тохкама института болхлочо Дзараханаькъан Зейнапа, моттигарча пхьарий цхьанкхетара кулгалхочо Галай Адама. Массане а белгалдаьккхар пхьара деш дар йоккха говзал эшаш а.
Гойтаме хьажа оттадаьдар сурташ, дахчах хьаяь зӀамига а йоккха а гӀалаш, пенаш хоздеш вай даьша леладаь гӀирсаш, боккхийча наьха Ӏасаш. Нагахьа санна гӀалаех дувце, уж Ӏалаьмате дукха яьй цо.
Духхьал тайп-тайпарча мехкашкарча нахага кхаьча уж ши-кхо эзар хургья. Цхьаяраш совгӀата тийннай цо, цхьаяраш Наьсарерча МутаӀаланаькъан Хь. цӀерагӀча урам тӀарча «Лезгинка» яхача тика гӀонца ехкай.
