Iан денош латтача хана гIорабеш, ахкан ха хьаэттача дом буаш, йIовхал ловш дIаух иштта къахьегарий денош. Шийлача ара гIораваь латтача сага «хах» аьле хеталу, йIайхача «газела» чу дIачухайча, бакъда, вай наькъашка лелача машенашта юкъе атта нийслургьяц цу тайпара моттиг. Ша баь кораш долаш, массе моттигашка гIолла чубетташ шийла Iан мух болаш, хул хийла яй хьаотташ йола «газель». ХIаьта, хIанзара йIовхал хьаэтта ха теркалйича, демах хьалдизза хулача гIандаш тIа пIелгаца сурташ а дохкалургда хьона. ХIара дийнахьа дIа-хьа ухача наьха са лаьцад цу гIулакхо, бакъда мичахьа, хьанга латкъа беза, малагIа оагIув оарцагIбаьккха, из хьал меттадоаладергдар хац-кх. БархI гIанд дагIа дезача машена чу тоIIадий, кхойтта гIанд дегIе аравоалача «газела» даьга из гIулакх хатта саг вац-хьогI укх мехка, аьле хет... Геттара дом айлуш ха я бIаьсти.

Ара мух латт, тишача, цхьан хана «Зокха чу» яьххача беса, скотчаца чIоагIйича санна йолча «газела чу» хьалйиззе дом уллаш хул. Сийрда барзкъа тIадувхаш цу чу ваьгIа Iоваьнна саг-м, тIаювхача хIамай бос кхы тайпара болаш хул. ТIаккха, иштта болаш, шоай балха дIабаха беза наьха.

Хийла оалаш хезад-кх сона, сийрда хIама тIаювха йиш йолаш мичай уж вай «газелаш», сийрда барзкъа тIадийха араяла хьагаш лел-кх со, аьле. Геттара чIоагIа раьза йоацаш, къамаьл дир цкъа МагIалбике йодача «газела» тIа хьалтIаяьннача кхалсага кондукторга. Ди дикка сайрангахьа леста хиларах, хьатIахайра из кхы де хIама доацаш.

«Наьсарера МагIалбике кхаччалца яха еза машен мишта йоалийт оаш новкъа, ер тайпара хьал чудолаш? Гаьна моттиг ма йий тха даха дезар, цига дIакхаччалца укх чура дом буаш дагIа дезаций тха? ЧубагIача нахах эхь цахетар мара хIама дац из», — яхаш, къамаьл дора, цу гIулакхо дикка сатем боабаь хьайоагIача кхалсага. Цо из дIадоладарах, майрабаьнна нах а, гIадбаха, бехкаш даха болабелар. Кондуктора шийга, нах раьза бац хьа машен бIеха я, яхаш, аьлча, велавенна, нанес пенси Iоадича цIенагIъяр эцаргья аз, аьнна, дIаюстарваьлар вIалла а цу чу багIача нахах эхь, бехк хеташ воаца «газела» да.

Ше да вола хIама цIена, хоза ца леладар, Дала шийх къахетам баь хьаденначунцара хьурмат доадар да! БIарччача дийнахьа нах дIа-хьа кхувлаш хийхка машен, шоллагIча дийнахьа новкъа мишта йоаккх, цIен ца еш. Цу машенаца хьайна, хьай дезала напагIа доаккхаш лелаций хьо?! Мах боацаш мича кхувл Iа нах дIай-хьай. БIарччача дийнахьа тIабижа дом дIабаккха, кIалхара кIийле йила-м безац боккха къахьегам. ЧубагIача нахах эхь хеташ, царцара эздел лорадеш волча сага демаша яьккха машен болх бе арайоаккхаргьяц!

Ишттабараш а ба вайна-м, цхьа наггахьа мара нийслуц-кх уж. Хийла, иштта бIеха йолча машена чу дIачухьежача, чу ца ховшаш юхабоал-кх нах. Бизза мах хьаэцаш хье болх беш лелаш вале, хьайгара дIадоагIар а лерттIа хилийта! Хеталу, ванагIа вIалла из хIама теркалде бехктокхаме оттабаь нах бац вайцига аьле... Ший юхь лораеш вола саг, ший дегIаца лерхIам лелабер, наха юкъе эздий гIулакхаш мара шийгара ца гойташ хул. Сагота болх бацар из-м, яхаш, кулг тесса, нахацара лерхIам боабаь лелар, эггара хьалха шийцара лерхIам боабаь саг ва. «Газелаш» хехкача наха юкъе газет дешараш бале-м, хийла даьна ше вовзаргва! Хозадар хоза да, яьхад вай даьша. Уйла е вай, тахан лерхIам ца беш дитача хIамай!