-Со ва Озанаькъанн Накир, - аьлар балхага хьожаш латтачо. Ер са гӀулакх де мукъа хуле тамаш я, аьнна, хийтар сона. Айса бена никъ дӀабийцар аз, се пхийтта сурта гомаш хьадайта дагахьа венилга дӀа а къодадеш. ХӀанз айса хьабенача новкъа ваьсса цӀаваха веза-кх са, яхаш, уйла еш со латташ, вӀалла дага цахиннар хилар. Раьза хилар Накир са дехар кхоачашде; цул совгӀа, из лоаццача хана де дош а делар. Кхы цун болх ца боабеш, айса хьадена гомий бустамаш цунга дӀа а денна, цо йиллача хана юхавоагӀаргволаш, цӀавахар со. ЦӀаькха со юхавахача, ший пхьоалле чувигар со. Беш йолча оагӀорахьа Ӏодаь дӀаьхха отар дар, пенех, тховнах, истолаш тӀа Ӏояьхка ядар тайп-тайпара балхаш деча эша жӀовнаш, осташ, херхаш, отара кӀалха хьалдадар цо даь цхьацца балхаш. Тхоашта цо даьча гомашка хьежар со, чӀоагӀа раьза хилар царна. Цул тӀехьагӀа, театральни тумба тӀа оттае мӀаьжг е аз аьннадале а, цо йижа улла борз яьяр боала дахчах. Хоза яьяр чӀоагӀа. Се дӀавахале, аз аьлар:

-Тхона суртанчаша, мах боацаш, цхьацца совгӀаташ даьд, Ӏа лургбарий тхона хьай балхех моллагӀа цаӀ?

Дукха уйла ца еш, пенах хьалвелла воаллаш вола тӀемхо хьа а ийца, хьакховдавир цо. Из Накира хьаваьвар ара шийна кораяьча гоамача дахчах. Са гӀадвахар дувца а дезацар. ХӀанз а ишколерча музее боча хеташ лелаву аз из «ТӀемхо». Иштта вайзар сона Ювназа Накир.

Из ший балхаца дувзаденна дешар дийша вацар, вешта аьлча исбахьален ишкола, училище е суртанчий академи яьккха вацар из. Ше Ӏомадаьдар цо из гӀулакх. Вайна ма харра, Пушкин а хиннавац литературни институт яьккха, бакъда байташ дика язъеш хиннав. Из ала мегаргдолаш вар Накир а. Цо даьча балхашта юкъе да «ГӀарбаш», «Мурдаш», «Когсоалозашца хехкабалар». 1975-1976 шерашка даь уж балхаш, алхха дахчах даь да.

Накир ше воаца дикка ха я; бакъда цун балхаш, пхьарах дола дагалоацамаш санна, дахаш да Сурхо тӀарча 9 шера дешача ишколе.