Поэтессай керда жай
«Пайхамарий мухьар» яхача Дидиганаькъан Раисай кхоллама балхах
Вай тахан книжка оалачох, вайл дикагӀа гӀалгӀай мотт а ховш, бусалба ди а бовзаш болча наха жай оалаш хиннад. Масала, цхьа каьхат дийшад аз Нохч-ГӀалгӀай книжни издательстве редактораш хиннача Къоастой Ӏалиханеи (Ӏусман-молла воӀ), Заьзганаькъан Азаматеи (БатӀал-Хьажий йиӀий-воӀ) кулгаш яздаь. Цар цу тӀа книжни издательствох «жайний зарбанче» аьннад. Товш а нийса а да. Дерригача книжкаех ала йиш еце а, жай да, аьнна; бакъда дукха ха йоацаш «ТПК «Центробланк» яхача Москверча ООО кепа теха арадаьккхача «Пайхамарий мухьар» яхача книжках майрра ала мегаргда, из жай да, аьнна. Цун чулоацамо а таро хулийт цох иштта ала, хӀана аьлча бусалба динца, Мухьаммад-Пайхамарца (с.Ӏ.с.) дувзаденна дешаш да цу тӀа дувцараш. Цу эзар мара доацача книжкаех шиъ «Сердало» газета болхлошка а кхаьчад, автора кулг а яздаь, совгӀата лу, аьнна.
Эрсий меттала яздаь байтий книжка кхаь даькъах латташ да: хьалхара дакъа – «Мухьаммад-Пайхамарца (с.Ӏ.с.) жугтий Ӏилманхоша даьча къамаьлах лаьца», шоллагӀа дакъа – «Жугтий хаттараши царна денна жопи», кхоалагӀа дакъа - «Чакхдалар». Книжкан ши редактор ва. ЦаӀ Наьсарерча доккхача маьждига имам ЦӀолой Хизар ва, хетаргахьа, цо лораяьй жайна динца ювзаенна оагӀув; шоллагӀа редактор Ноакастхой Хаваш ва, цо литературан говзал тӀа болх бича санна хет сона. Цул совгӀа, маьждига имама дешахьалхе а язъяьй цу книжканна. Хьож вай цо фу аьннад: «Говзача а начӀал долча а бокъонца гӀалгӀай халкъа поэта Дидиганаькъан Раисас яздаь, ХVӀ бӀаьшерен туркий Ӏилманхочун а йоазонхочун а Фурате «Кырк Сюаль» яхача йоазон ларагӀа кхелла «Пайхамарий мухьар» яха китаб, Даьлагара вайна Раисайга а цун кхолламга а гӀолла десса дика санна лархӀа деза, тӀеххьара пайхамар а наха юкъера дикагӀа хинна саг а боарам боаццаш вайна дукха везарах».
Книжка чакхдоалаш дукха доккха доаца дошлорг деннад, йоазон юкъера цхьадола дешаш кхетадайташ. Боарамга диллача боккха болх ба из, из латт 504 оагӀонах.
Укх деношка Магасерча «Артис Плаза» яхача моттига конференц-зале из книжка довзийташ моттиг хилар. Цига гулбеннабар йоазанхой, Ӏилманхой, журналисташ, кхыбола республикан бе-беча цхьанкхетарашка къахьегаш бола нах. Цар дийцар книжкан чулоацамах, лоархӀамах, Дидиганаькъан Раяйна карагӀдаьннарех лаьца. Массехк дош аргда вай цох шийх лаьца.
Хазбенаькъан (Дидиганаькъан) Або-Бакара Раиса яьй 1956 шера Казахстане. Наьсарера №1 йола ишкол яьккхачул тӀехьагӀа, Пятигорскера доазол арахьарча къамий метташ Ӏомадеча институте деша яьгӀай. Цул тӀехьагӀа, ше деша яьгӀача ишколе завуч, директор хиннай. Советски балха тӀа хиннай Раиса, из яр Наьсарен кхален исполкома кулгалхочун заместитель, цу тайпара болх бир цо демократически новкъа вай мохк баьлча а, Наьсарен-Шахьара мэра гӀонча йолаш. Раиса Россе йоазанхой Союза доакъашхо я, цхьан юкъа ГӀалгӀай йоазанхой Союза правлене кулгалхо хилар из. Яхаш а къахьегаш а я Наьсаре.
Тахан вай дувцаш дола книжка яздаь хиннад 2018 шера, арадаьннад 2023 шера.
