Халкъа йоазонхо йоккха цӀи я
Пхьилекъонгий Махьмад-СаӀида 95 шу дизад
Укх деношка 95 шу дизад, гӀорваьнна гӀалгӀай халкъа йоазонхо Пхьилекъонгий Махьмад-СаӀид вича денз. Къаман литературе беркате къахьийга, йоккха лар йита саг ва Ӏасолта Махьмад-СаӀид. ЗӀамига волаш Сибре вига кхеставаьв. Цо оалаш хезад сона; цигара цӀавале, Советий мехка мел йола трактор лелае ховш вар ше, аьнна. Вешта аьлча, бакъвола къахьегама саг волаш кхийнав из. Нагахьа санна кхолламо хьона цхьа говзал, дакъа деннадале; из гуча ца даьлча Ӏергдац. Иштта гучаяьннай цунна енна хинна литературни говзал. Цо ваьв цох дуккхача, дикача йоазоний да.
Махьмад-СаӀида къахьийгад тайп-тайпарча жанрашка. Цун кхолламе я романаш: «Хала урхе», «Син цӀенал», «Балан ди» (байташца язъяь); повесташ: «Этии Вутии», «Къонгий дув»; дувцараш: «Матрос», «ВӀашагӀкхетар», «Салтечун дувцар», кхыдараш. Дукха къахьийгад цо поэзен даькъе, цун дешашта даьха дукха цӀихеза, наха дезаденна иллеш да: «ГӀалаш латт са ТӀаргаме», «Мадина», «Алал сога», кхыдараш.
Вай Сибрера цӀадаьхкачул тӀехьагӀа, сона дагадоагӀаш, Махьмад-СаӀид болх беш хилар Нохч-ГӀалгӀай радиокомитете диктор, литературни передачай редактор, гӀалгӀай передачай воккхагӀвола редактор, Нохч-ГӀалгӀай йоазонхой Союза литературни консультант а секретарь а волаш. Дуккхача къонача, кхувш боагӀача йоазонхошта нийса никъ харжа гӀо дир цо цу шерашка.
ГӀалгӀай республика хьайилехь Махьмад-СаӀид ваьхар Шолжа-ГӀалий тӀарча Калинина цӀерагӀча моттиге; хьаяьчул тӀехьагӀа – Наьсарера завод йолча оагӀорахьарча «кӀайча цӀагӀа». Цхьан юкъа из керте лаьттар ГӀалгӀай республикан йоазонхой Союза правленена.
Кхелхав Ӏасолта Махьмад-СаӀид 2004 шера.
