Вай къаманна беркате хинна шу
Сибре лайна, цIабаьхкача кагирхой-хьехархой хьалхара выпуск
Сибрера цIабаьхкачул тIехьагIа, 1962 шера Нохч-ГIалгIай хьехархой институт яьккха хьалхара гIалгIай кагий нахи мехкарийи: (аьрдехьара аьттехьа) ГIамарзанаькъан М., Малсаганаькъан Ахьмад, Албохчанаькъан Н., Мамилганаькъан А., Балай Х., Гавришевская Зинаида Афанасьевна, Котанаькъан Хь., Аьлданаькъан М., Берсанаькъан I., Битенаькъан Хь., Наурбенаькъан И., Меданаькъан Й., Шекурова Генриетта Васильевна, Коазой I., Дахкилганаькъан И., Шаденаькъан С., Ведажанаькъан Н., Малсаганаькъан Або, Къоастой Б.
Вай мохк меттаоттабаьчул тIехьагIа, Нохч-ГIалгIай паччахьалкхен хьехархой институте гIалгIай кагий нахи мехкарийи деша айтта укх шера 65 шу дизад, хIаьта уж дийша баьннача хана денз 60 шу дизад. Сона хеташ, вай къаманна беркате хиннад 1962 шу. Цу шера эггара хьалха филолого-исторически факультет яьккха нах, таханалцца мехка накъабоалаш; Iилманхошта, хьехархошта, йоазанхошта, журналисташта юкъе болаш, хьабаьхкаб. Дукха дика гIулакхаш карагIдийннад царна. Къаман дешар, литература, культура дIахьалхакхувлаш лаьттаб уж, ах бIаь шу совгIа йолча хана. Царна юкъе хиннача, цу шера дийша баьннача кагийча наьха, мехкарий цIераш яьхача а кхетадергда, мел доккха а хала а дукъ хиннад царна тIалаьттар. Масала, царна юкъе хиннав Дахкилганаькъан Iадрахьмана ИбрахIим. Из вайна массанена дика вовзаш ва филологически Iилмай кандидат, профессор санна. Цул совгIа йIаьххача хана Нохч-ГIалгIай паччахьалкхен университета гIалгIай литературан хьехархо, филологически факультета декан, ГIалгIай Iилма-тохкама института директор, ГIалгIай паччахьалкхен университета хьехархо хилар из. Россе йоазанхой доакъашхо; «Куке денал», «Шутар», «Берд» яхача книжкай автор вар ИбрахIим, иштта цо яздаьдар гIалгIай литература дегIаахара, багахбувцам тахкара хетадаь Iилман балхаш.
Эггара хьалха дийша баьннарашца хиннаб кхы а дукха цIихеза нах: Малсаганаькъан Увайса Або (литературни критик, Нохч-ГIалгIай радио керттера редактор, «Лоаман Iуйре» яхача альманаха а «Литературни ГIалгIайче» яхача журнала а керттера редактор), Малсаганаькъан Оарцхой Ахьмад (Нохч-ГIалгIай паччахьалкхен университета эрсий литаратуран кафедра доцент, тIехьагIо профессор), Дударанаькъан БатIала Урусхан ( ТIой-Юртарча юкъерча школан завуч, юртда, ООШ директор), Къоастой Махьмада Башир («Сердало» газета промышленноста а гIишлошъяра а отдела кулгалхо), Шаденаькъан Арсмака Султан («Сердало» газета отдела кулгалхо, Нохч-ГIалгIай телевидене воккхагIвола редактор, Шолжа-ГIалий тIарча книжни издательствон дешара литературан отдела кулгалхо, гIалгIай телевидене председатель, Iилма-тохкама института Iилман болхло), Меданаькъан Жабраила Йоакъап (Сурхо тIарча юкъерча школан директор, халкъа хьехархо, СССР дешара тIехдика болхло), Коазой Аюпа Iийса ( хьехархо, халкъа йоазанхо). Иштта царна юкъера арабаьннабар университета бе-беча кафедрашка хьехаш хинна ГIамарзанаькъан Марем, Битенаькъан Хьава, юрташкарча школай, интернатий директораш, завучаш, мугIарера хьехархой.
Царех массарех хьабаьннача пайдан мах бе эттача, сона хеташ, мах булургбацар, иштта доккхий дикаш, беркат шоаех хьадаьнна нах ба уж. Сибре, вахара халонаш яйза болча цар, хам беш хиннаб шоашка кхаьчача гIулакха. Цудухьа, цунца чам болаш, деша а дийшад цар, цул тIехьагIа шоаш Iоадаь хьаькъал тIехьа тIабоагIарашта дIа а деннад. Царех дуккхачар хьийхад сона а. Масала, пхелагIча классе со вагIача хана, сона гIалгIай мотт хьийхар Меданаькъан Йоакъап вар, цхьан юкъа тха классан кулгалхо а хилар цох. Университете дешаш волаш, сона хьехаш бар Дахкилганаькъан ИбрахIим, Малсаганаькъан Ахьмад а Або а, Битенаькъан Хьава, ГIамарзанаькъан Марем. «Сердало» газета редакце болх баьб аз Къоастой Башираца, Нохч-ГIалгIай книжни издательстве къахьийгад Шаденаькъан Султанаца. Дуккхадар царгара дайзад, Iомадаьд. Со мо цар кхебаь кагий нахи мехкарийи бIаьш, эзараш ба. Цудухьа, цIаккха кIал ца дусаш, хьадоагIа вай Iилма а дешар а. Тахан наггахьа саг мара висавац царех, амма цар йита тIехьале цIаккха йовргьяц, лергьяц; ноахалгара ноахалга йоалаш яхаргья из.
