ХIана хувцаденнад из таьрахь, фу бахьан да цу тайпарча эргалонна Iаткъар? Россе эггара хьалхара газет хьаде аьнна мукъа беннар хиннав паччахь Пётр I, «Ведомосташ» аьнна цIи а йолаш, из арадаьнна хиннад, 1703-ча шера наджгоанцхой бетта 13-ча дийнахьа. Цудухьа кепайоазон ди лоархI, хьалхара газет арадаьннача денах. Цох хьадаьнна беркат да вай къаман меттала а эрсий меттала а республике арадувлаш дола газеташ. «Ведомосташ» арадаьнна 220 шу даьлча арадаьннад гIалгIай хьалхара газет «Сердало», кхы а 70 шу даьлча арадаьннад Наьсарен района «Колхозхо» (1939), цунна тIехьа даьхкад вай кхыдола Шолжа района а МагIалбика района а газеташ, «Заманхо» яха республикан кагирхой газет, эрсий меттала арадувлаш дола «ГIалгIайче».

Вай къаман хьаькъал долашагIа бола нах лаьттаб цар редакцешта керте. Царех ва гIалгIай йоазув хьакхелла Малсаганаькъан Зоврбик, Дахкилганаькъан Ахьмад, Овшанаькъан Махьмад, Лаьнанаькъан Мустафа, Тебой Тухан, Гадаборшакъонгий Осман, Зангенаькъан Микаил, Дидиганаькъан Борис, Доврбиканаькъан Закре, Шаденаькъан Хьусен, кхыбараш. Вай вахаре йоккха моттиг дIалоацаш, Беканаькъан ДордагIа Тембота аьннача тайпара, «...ткъамаш дIаьха долаш, бIаргаш сийрда а долаш...», шедар зувш, дикадар хоастадеш, водар IотоIадеш, цунца къовсам лоаттабеш, хьаденад вай массе а газет. Тахан а из болх юкъагIа ца буташ, хьинаре къахьегаш я цар редакцеш.