Хоза баь болх
Къаман суртанчий кхолламаш дувца книжка
Дукха ха йоацаш кепа а теха, арадаьннад вай къаман къаьнача а къонача а суртанчий, скульпторий кхолламаш дувца, хозача сурташца кечдаь «ГӀалгӀай сурташ кхоллара говзал» яха книжка. Эггара хьалхарча вай суртанчашкара болабенна, таханарча денга кхаччалца цар хьабена никъ бовза йиш я из дешачар. Книжка дийкъа да массехк доккхача даькъа. Царех да «БӀаьшерений Ӏаьдалаши гӀалгӀай культуран юхьиги», «Кулга говзалца кхоллача гӀалгӀай искусствон къаман Ӏаьдалаш», «Сурташ кхоллар хьадоладалар», «ГӀовнаш кхоллара гӀалгӀай говзал», «Кердадар юкъеденача гӀалгӀай суртанчий кхолламаш», «Графикан говзанчаш», «Къонача суртанчий кхолламаш», кхыдараш. Книжках а музея 30 шу дизарах а дувцаш да сурташ кхолларий ГӀалгӀай паччахьалкхен музея кулгалхочо
Кердача книжко довзийт вай къаман ширача пхьараша кхелла дошо-дото хӀамаш, къаман барзкъа, пхьегӀаш, гӀалаш; хьалхара суртанчаш Ӏоахарганаькъан Хьажбикар, Доврбиканаькъан ГӀаьза-Махьмад. Го йиш цар шоай сурташ а цар кхелла дола тайп-тайпара чулоацам бола балхаш а.
Къаьстта белгалбаха лов, халкъа кхоллам дӀахо а биц ца болийташ, шоай кулгашца тамашийна хозал хьакхоллаш хинна а тахан хьакхоллаш хьабоагӀа а нах. Царех ба къаман гахьар тӀадола истингаш хьакхоллаш бола кхалнах, дахчах хӀамаш хьаеш бола нах. Цу оагӀонца къахьегаш хиннарех вар гӀорваьнна республике вовзаш хинна Озанаькъан Накир. МоллагӀча дахчан юхках а саг цецваллал йола хозал кхолла ховш вар из. Иштта цу лостамагӀа къахьегаш хьавоагӀа карарча хана Пхьиденаькъан Адам, кхыбараш.
Къаман говза скульптор ва, аьнна, майрра белгалваккха мегаргволаш вар Маменаькъан Руслан, са ханарча а тахан Шолж-ГӀалий тӀа бахача а наха дика довз, Сийлахь-боккхача Даьймехка тӀема хана цӀерашта духьала къовсам лоаттабаьча наха хетадаь цо даь сийленг. Из нохчий республикан столицерча заводской районе латт. Цунга а хьажа таро я книжка дешачар.
Йоккха моттиг дӀалоац книжка тӀа кердача новкъа баьнна, дуккха эргалонаш шоай кхолламашта юкъекхувлаш хьабаьхкача, цӀихезача суртанчий вахарах, цар кхеллача балхех лаьца даьча йоазоша а цар сурташа а. Царна юкъе а эггара хьалха цӀераш яха мегаргьярех ба Поаланкой Мурад, Аькхенаькъан Хасолта, Эсамарзанаькъан Заьлмаха, Имагожанаькъан Ахьмад, Овшанаькъан Ӏийса, Барханой Ӏийса, Дахкилганаькъан Бек-хан, кхыбараш.
Цхьабола вай къаман суртанчаш ба, духхьал басарашца къахьийга ца Ӏеш, грифика оалача даькъе шоай говзал гойташ. Цкъа Доврбиканаькъан Башира пхьоалле чуваха вагӀаш, цо сона гойтар цу лостамагӀа ше кхеллача балхий альбом. Наьсарен кхале цӀехеза мел волча сага сурташ дийхкадар цо къоаламцеи шаькъацеи, царех цхьадарашта аз кепа техар цу хана се болх беш хиннача Наьсарен газета оагӀонаш тӀа. Цул совгӀа, цо ишколерча музейна совгӀата деннадар «Сурхо тӀара хьайра» яха сурт. Къаьнара хьайра дӀаяьккхай, бакъда из бӀарга ца яйначарна Башира сурто довзийт из мишта хиннай. Графикаца къахьегаш ба Имагожанаькъан Х-А., БӀазенаькъан З., кхыбараш.
Иштта йоккха моттиг дӀалоац книжка тӀа къонача суртанчаша а, царна юкъе ба ГӀудантанаькъан Дукхеш, Цхьорой Аюп, Даканаькъан Къаьдар, Пхьаранаькъан Ӏалихан, Доврбиканаькъан Ӏашат, Доврбиканаькъан Роза, Малсаганаькъан Тархани Любаи, Мартазанаькъан Муса, Оздой Дауд, и. кх. дӀ.
Книжка цхьатарра дезалургда аьнна хет тайп-тайпара ханаш йолча наха, хӀана аьлча массанена корадергда цу тӀара шоашта гарга а хьамсара а дола йоазош а сурташ а. Книжка арадаьннад Дона-тӀарча-Ростове, «Бибоп» яхача кепайоазон моттиге.
