Хьалха леладаь даьй хоза гӀулакхаш кагирхошта хьалхадахар вай декхар да. ДӀаяхача ханашка вахара хьалаш, тахан санна доацаш, халагӀа хиннад. Цудухьа вай даьша лелаяьй йоккхий бешамаш, хьаштдале, гектараш уж хьа а ийеш, къаьстта цу тӀара эцача пайдах дезала напагӀа доаккхаш хиннад. БӀаьстан юххье йоккхий бешамаш дӀае нах арабаьлча, лаьрххӀа белхий а бийя, шоайла дӀа-юха бехаш хулар. Хьаьнала болх лоархӀаш а бар из, хӀана аьлча лаьтто кхоаб вай. Цунах хьадаьннар, хьахиннар мара даа йиш йолаш а дац адам. Цудухьа хӀаравар, хоза а хеташ, водар новкъостал де. Цунах хулар беркат а хьурмат а. Цу гӀулакхаша нах шоайла вӀаший тӀаозар, безамегӀа хулийтар. Цунца дувзаденна дар вай къаман кхыдола хоза гӀулакхаш а.

Тахан зама кхыча беса йода. Цунца наьха уйла-нигат а хувцаденнад. Вай къоаноша хьалхадоахаш хила деза уж хоза гӀулакхаш кагирхошта. Деррига тахан во да ала йиш яц, бакъда хьалха хинна йӀовхал юкъера дӀайоалаш латт. Масала, цхьан дийнахьа Ӏаьдала транспортаца йодаш яр со. Сона тӀехьашка доаллача гӀанда тӀа вагӀар цхьа берашха саг. Телефонаца деш долча къамаьлах, кхетадир аз, цо ший вешийца из деш хилар. «Кхоана белхий беш вар со, воагӀаргварий хьо сона?» — йоахар къамаьло. Из юха жоп даларо кхетадайташ дар. ХӀаьта телефонаца къамаьл деш хиннар, чӀоагӀа раьза воацаш, везлуш вар. Ше телефон Ӏойиллача, шийна уллув вагӀачунга цо аьлар: «Са воша ва из воккхагӀвола. ВӀалла а йистедоалаш дац цун балхаш, даьра, кӀорда-м ваьв сона из». ЧӀоагӀа догьийккхар са цу зӀамигача сагах. Эсала гӀулакх дар цо гойтар. Цигара дӀадолалу юкъера гаргалол мелъялар, безам шелбалар.

Нанас ваьча сагаца лерхӀам хилар юкъера дӀадоаккхе, фуд вайна дусар, вай тӀехьенга фу кхоачаргда? Цудухьа тӀехьенга кхоачаш, тахан юкъера гаргалол меллургйоацаш, хьалххе а дӀайолла езаш лард я из. Тахан вайна дукха телефонаш, компьютераш юкъеяларца, тхьовра санна вахара-вара хьал тӀехьашкадоалаш латт.

Бетта цкъа а телефон ца тохаш бола гаргара нах бовз вайна. Ден-бус юкъе фу доалл хац, дукха ха яьлча сагота хила веза, гаргарча сагага фуд-малад хара. Цигара хьадоагӀа цӀенъюкъера дезал а шоайла хийрабалар. Да а нана а сагота хила деза, тӀехьенна юкъера морзо лоаттаяра. Цар беннача хьехамга хьежжа мара хила йиш йий дезал?

Эшача новкъостала гӀоргвеце, дезача га доаккхаргдеце, сенна веза нанас ваь саг?

Цунах тара хийтар сона, «газела» чу ваьгӀачун къамаьл. Уж моргаш вайна юкъе шортта ба.