Театр – цун шоллагӀа цӀа
Зангенаькъан Руслана 60 шу дизад
Вай къаман культуран болхлошта юкъе а волаш, дуккхача шерашка хьалха дӀабахача театра болхлой Ӏадаташ лорадеш а леладеш а, наха салоӀам беш, паччахьалкхенна накъавоалаш хьавенав ГӀалгӀай республикан гӀорваьнна театра артист Зангенаькъан Руслан. Из ваь хиннав 1964 шера журналиста Хасолта Микаилеи Къоастой Ювсапа Мадинайи дезале. Укх шера 60 шу дуз, из малхаваьлча денз. Ше сакхетарг хилчахьа; ашарашца, театраца безам болаш хьавенав из. Наьсарерча ашарий ишколе 6 шера фортепьяно Ӏомабеш хиннав Руслан. Бера хана ловзаяьй «Золушка» яхача фаьлга юкъера юхь. Ишколе дийша ваьлча, деша вода Тбилисерча театральни институте. ДӀахо дукха а цӀенхашта а балхаш ду цо.
Актёра ловзаяьча йовхьамашта юкъе я В. Маяковске «Клоп», Н. Думбадзе «Сона малх гу», А. Цагареле «Ханума» яха пьесаш. ТӀеххьаръяр гӀалгӀай меттала яьккхар а Руслан ва, ший новкъосташца Доврбиканаькъан Микаилца, Хьулахой Гиланеца, Цхьорой Хадеца. Цул совгӀа, из спектакль дипломни шиннех цаӀ яр, шоллагӀбола дипломни болх хилар цар Герчиковси Прохановси язъяь «Сай наькъа вода со». Театре болх беча шерашка, цо дакъа лаьцад Гоголь Н. «Ревизор», Боканаькъан А. «ЦӀий кхайк», Чахкенаькъан С. «Террор», «Асхьаб Бендер» яхача а кхыча а балхашта юкъе. Цкъаза болх беш йола моттигаш а хувца йийзай цун. Цо къахьийгад Базорканаькъан И. цӀерагӀча драматически театре, Наьсарерча культуран цӀен халкъа театра режиссёр волаш, халкъа иллеш дӀаоалача тоабан кулгалхочун дарже. Шин-кхаь шера болх баьб «Заманхо» яхача театре, итт шера – «Зокх» яхача цхьанкхетарца.
Руслана дакъа лаьцад цхьацца кинофильмаш доахача. Масала, Янданаькъан Жамалданна хетадаь фильм доаккхаш, цо йийшар «Ва Хьагоз», «Хьетт», «БӀарга хиш», цӀераш йола байташ. Мамилганаькъан Сулумбика «Лоаман ашараш» яхача фильман юкъе да цо дӀаоала илли. Иштта Руслана дӀааьннад вай республикан керттера илли – гимн.
