Мехкада: «Хьалхарчар Болама» юкъе 46 эзар совгӏа саг ва
«Хьалхарчар Болам» яхача ерригача Россе юкъара паччахьалкхен берий, кагирхой моттигерча оагӏоно тахан дӏахьоча балхах дийцар вай мехкадас Келаматанаькъан Махьмуд-ӏаьлас. Таханарча дийнахьа 46 эзар совгӏа хьинардар, 6 эзар совгӏа хьехамча ва цу оагӏонца къахьегаш.
Шоай гӏулакх цар боаггӏача боараме дӏахьоргдолаш, 244 моттиг я хьайийлла. Ишколашка санна культуран, спорта доазонашка; иштта кхычахьа а я уж. Вай Мехкадас белгалдир, кагирхой, бераш цу юкъе чуозара тӏехьа республике боккха болх лоаттабелга.
Геттара лоархӏамеча кхетаченех я аьнна белгалйир цу оагӏонца «Россе ишколера бӏаьсти» яха фестиваль, «Дӏалакха, Даьхен лорабой Денна хетадаь» яха концерт.
«Вай бераша шоай хьинар, низ гойташ хилар, дикача гӏулакхашта тӏехьа уж белгалбалар дега тоам беш да, из деррига теркалдеш ва со тахан. Шоай докладаш, авторски проекташ йовзийташ, цар къахьегаро хьахьокх уж доккхача гӏулакхашка кхача гӏертар. Иштта йолча проекташка дакъа лацаро гранташка, кхыдолча дикашка кхоачийт уж», - белгалдир Мехкадас.
Юкъарча моттигаша, хьехархоша, хьакимаша кагирхой оагӏув хьаллацар лоархӏаме да. Мехка Кулгалхочо теркалдечох, ишттача наькъаца тоабаца болх дӏабахьа, шоай начӏал доаржаде, пайда хургбар хьахаржа аьттув хул къонача тӏехьен.
«Хьалхарчар Болам» яхача оагӏонга гӏолла дуккхача дикашта тӏехьа белгалбала аьттув ба кагирхой, дӏахойодача хана шоашта накъадаргдараш ӏомаду цар, хьехамчаша нийса никъ хьехаш.
