Мехкада: Вахар хаьда хӀара саг – меттаоттаве йиш йоаца хатар
Ахка доладелча денз, хи чу ваха вахар хаьдад вай мехкарча ялх сага, царна юкъе да ши бер. Диъ хатар Эса тӀа хиннад, ши хатар Ӏам чу. ДӀадахача салоӀача деношка хи чу вахача шин сага юкъе бер дар. Вай Мехкадас Келаматанаькъан Махьмуд-Ӏаьлас из хӀама геттара хала хеташ къамаьл дир.
«Вахар хаьда хӀара саг – меттаоттаве йиш йоаца хатар, вӀалла а дег чура дӀаяргйоаца чов я. Кхы а халагӀа да, лоравелча хургдацар-кх из яхача уйло дега Ӏоткъам бар», - аьлар Мехкадас.
Бахархой лоралуш хилара, бокъо йоацача моттигашка лувча цаахара, тӀахьожам боацаш бераш цадитара тӀахьех Мехкадас. Республикан кулгалхочо белгалдир, хин юхе кхаьчача лораде дезараш малагӀаш да берашта массахана хьалхадаха дезилга. Мехкара хьакимаш тӀахьожам беш ба уж хатараш цахилийтара.
Арабаьнна къахьегаш ба МЧС болхлой хин моттигашка «Лувча йиш яц» яха улгаш хьалдетташ, рейдаш дӀакхухьаш, лувча кхераме йола моттигаш лораеш, салаӀа арабувларашта тӀахьожам беш.
