Мехкада: Тхона гу, юртбоахам дегӏабоагӏаш хилар
Гӏалгӏайче гуш да ахархой даькъ тӏа дика хувцамаш хилар. Республикан кулгалхочо Келаматанаькъан Махьмуд-ӏаьлас ший бувзама оагӏон тӏа дийцар керттерча толамех.
Эггара лоархӏамегӏа бола толам ба хьайбаш тӏакхеташ хилар 72 эзар. Кхача арахецара хьокхамаш а кхы тӏехьадусаш дац: шура яккхара боарам 74 - эзар тонн, хӏаьта дулха продукци - 8 эзар совгӏа тонн.
Республике иштта дика дӏабихьаб ялат чуэцара болх - 113 эзар тонн, из дӏадахача шера хинначул 2,5 дукхагӏа я.
«Оаха дика шердеш латт сомий бешамаш дӏаера дола дакъа а, цар дӏалоац 1250 гектар, иштта гулбу 66 эзар тонн сомаш, комараш»,- аьлар республикан Кулгалхочо; уж толамаш даха таро хилар белгал а деш; йоккхача агрокомплекса, иштта зӏамигача фермерски боахамаша цхьана къахьегарах. Царех цхьадолча боахамаша дика толамаш доах. Масала, Соагӏапчарча фермера Малсаганаькъан Мухьмада 47 центнер кӏа чуийцар гектара тӏара, ерригаш а 100 гектар яр цунга; цо иштта леладу хьайбаш, хӏара шера маьхалдоаккхаш бӏаь совгӏа хьайба.
Кхыдола масал - Булгучанаькъан Берта Гӏажарий-Юртара боахам. Укхаза 1000 гектар совгӏа хьалкхеду ка бола ялат, даьтта культураш, цо ший ханнахьа хий тохаш уж леладарах из хьувкъам лакхбелар 35-45%.
Хьувкъам совбоалаш, керда технологеш юкъейоахаш, ги леладар дегӏадоагӏаш хилар – цу дерригане а чӏоагӏъю Гӏалгӏайчен кхачан кхерамзле, иштта из дика дегӏаяра новкъостал а ду», - аьлар республикан Кулгалхочо.
