Мехкада: Цу унзарча дийнахьа вахар мел хаьдараш дагабоагӀа тахан Аькхенаькъан Марем
Наьсарерча РОВД йолча моттигá доккха зулам тӀадена 16 шу дизарца, мехкахошка къамаьл дир республикан кулгалхочо Келаматанаькъан Махьмуд-Ӏаьлас. Зуламхоша тӀаденача доккхача хатара юкъе 25 сага вахар хаьдар.
Мехкадас белгалдир, бокъонаш, нийсхо лораеш латтараш деналца духьалъэттабецаре, цу дийнахьа кхы а дукхагӀча наьха вахар хада тарлуш дар, аьнна. Мехка кулгалхочо белгалдир, вай къамо дукха хатараш лайнилга; 2004-ча шера Наьсаре зуламхой чухьийлхача, дукхача адама вахар хоададеш долча хатарга кхоачаш.
«Воча хӀаман духьалара низ чӀоагӀбеш хилар уж деррига хатараш. Тахан вайна гуш да, кхерамзлен хьал лорадеш, воча хӀаман наькъаш тедаш, лаьттача яхь йолча, деналах бизза болча къонгашка гӀолла мехка машар, барт этталга»,- аьлар вай мехкадас. Цу унзарча дийнахьа лийгарий цӀераш массахана вай дегашка яхаргья; цар гойтача деналах, майралах тӀехьенгара тӀехьенга кхоачаш дувцаргда мехка. «Уж нах цӀаккха биц ца беш, машар, паргӀато эггара лоархӀамегӀа дола хӀамаш долга кхетадеш, даха деза вай», - тӀатехар цо.
