Мехкада: Дукхача хана денз, бувзам ба вай къамашта юкъе
Республикан Денца даькъалабийцар вай мехкадас Келаматанаькъан Махьмуд-Ӏаьлас ГӀаьбартой-Балкхарой республикера бахархой, лоалаха уллача мехка кулгалхо Коков Казбек. Ший къамаьла юкъе мехка Кулгалхочо белгалдир, шинна республикан юкъе тхьоврча хана денз барт, безам, бувзам хиннилга; дукхача хана денз вӀаший тӀера долаш, юкъера доттагӀал чӀоагӀдеш вай хьадаьхкалга.
«Халонаш латтача хана вӀаший оагӀув хьаллоацаш, толамашта цхьана гӀадъухаш хьадаьхкад вай. Тахан а иштта юкъера бувзам, барт чӀоагӀбеш дола гӀулакхаш леладеш дахаш да», - аьлар Мехкадас. ГӀаьбартой-Балкхарой мохк вахара-экономически оагӀонца дикка тоалуш, къамашта юкъе дикаш доаржадеш, шоай хӀама лакхача боарам тӀа даккхара тӀехьа къахьегаш болга теркалдир вай мехкадас.
«Республике бахаш бола нах шоайла барт болаш, цхьоагӀо йолаш, мехка хӀама тоаде гӀерташ хилар бахьан долаш, тахан толамаш даха аьттув ба цар», - тӀатехар вай мехка Кулгалхочо.
