Бӏарчча шера карагӏдаьннараш дийцар Мехкадас, СКФО гӏолла волча паччахьа викалца Чайка Юреца
Къилбаседа Кавказа куран тӏагӏолла вола Россе Паччахьа викал Чайка Юрий, балхаца дувзаденна вай мехка вена хилар. Вӏашагӏкхетар долаш, дийцар 2025 шера де карагӏдаьннараш а, дӏахо де дезаш хьалхашка латтараш а. Къамаьла юкъе дукхагӏа теркам тӏабахийтар мехкара моттигаш дегӏакхувлара, хьурмата дешашта, къаман проекташ толамца кхоачашъяра, яхаш, дийцар «Сердало» газетага Мехкадаь а Паччахьалкхен а зарбан болх лелабераша.
Дӏадодаш долча шера республико дикка толамаш даьхад, вахара хьалашца дувзаденна наьха хьашташ кхоачашдеча даькъе. Ийс керда никъ билларца бувзабенна болх чакхбаьккхаб, 26 километр дӏоахал долаш; иштта хьадаь даьннад Илдарха-Гӏалий тӏара тӏий. Моттигаш тоаяра даькъе, 23 дукхагӏа нах тӏалатта доазув тоадаьд; цӏенхаштта тоаяьй ялх ишкол, Илдарха-Гӏалий тӏареи Наьсаререи шиъ берий беш. Цу моттигаша дикка тоадергда дешара гӏулакх. Модельни оалача хьисапе эргаяьккхай ялх библиотека. Цхьайола, карарча хана чакхъяха гарга йола гӏишлош, болх бе йолалургья кердача шера.
Къаьстта теркам тӏабахийтар лаьрххӏача тӏема операцена юкъерча наьха а цар дезалий а хьашташ кхоачашдара. Белгалдаьккхар, из гӏулакх Гӏалгӏайче цахаддаш а хӏара дезал теркалбеш а дӏахьош хилар.
Кхетаче иштта дийцар ӏан туризма ха дӏайолалуш хилар, из лоархӏаме моттиг я хьаьший республике ахарца ювзаенна, цунга гӏолла йовзийта йиш я, шоаш моргаш кхы йоаца мехка ӏалама таронаш, цу гӏулакхо кхолларгья балха керда моттигаш.
Вӏашагӏкхетара шинна а оагӏоно ма аллара, из деррига тӏадерзадаь да керттера а юкъара а декхар кхоачашдара – Гӏалгӏай мохк, кога тӏехьа ког боаккхаш, цахаддаш дегӏакхувлара а цун наьха вахара хьашташ дикагӏа кхоачашдара а.
