Мехкада: Магӏалбика деналах Сийлахьча Коталон дакъа хилар
Гӏалгӏайчен Кулгалхо Келаматанаькъан Махьмуд-ӏаьла вахар тӏема сийлен шахьаре Магӏалбике. Цу шахьаро ший цӏи цӏаккха йовргйоацаш йитай Сийлахь- боккхача Даьймехка тӏема исторе оагӏон тӏа. Турпала Магӏалбик лораю 1942-1943 шерашкара операци дӏахьош, мугӏарера къахьегамхой эттар, мехкадаьтта тӏакхача лаьрхӏа дола моастагӏчун нигат дохадеча гӏо де.
«Магӏалбика карагӏдаьннар, цӏаккха а довргдоацаш, дӏаяздир исторен оагӏон тӏа, из Сийлахь-йоккха Котало яккхарга баьккха лоархӏаме гӏа бар. Къаьстта цу сийлен лаьтта, 1942 шера денал долча бӏухоша юхатехар моастагӏа, Кавказа мехкдаьттан тӏа ца вайташ.
Чӏоагӏа тӏом лаьттар цу дукъ тӏа, бакъда немцашта хийттар чакхдаланзар, Кавказ яккхара лаьттача тӏем тӏа, вай бӏухоша гарга доаладир 1945 шера Коталон ди»,- аьлар Махьмуд-ӏаьлас, ше гулбеннарашка къамаьл деш.
Цо белгалдир, Гӏалгӏайче дика лорабу, тӏехьенга лу цу ханашкара дагалоаттам.
Хьаделлаш да керда дагалоаттама улгаш, тоаеш я тӏема сийлен моттигаш. Коталон Ди долаш, Магӏалбике лаьрххӏа хьадийллар Россе хьалхарча Турпалхочун Осканаькъан Сулумбика, цӏихезача лётчика, Россе Турпалхочун Оздой Мурада сийленгаш. Дагалоаттама белгало латт тӏом лаьттача Тирка дукъ тӏа.
«Сийлахь-боккхача Даьймехка тӏем тӏа вай турпалхоша гойта масалаш таханарча тӏехьенна накъадоал, цар дагалоаттам ца боабеш, сий деш вай ноахал хьалкхедара эшаш да из. Вай бӏухой шоай денал, майрал гойташ, вай Даьхе лораеш латт лаьрххӏа йола операци дӏахьоча даькъ тӏа а. Цар хьагойт шоай Даьхенцара безам, из да гӏалгӏай лаьтта эггара лакхагӏа мах беш дар», - аьлар Келаматанаькъан Махьмуд-ӏаьлас.
Тӏема сийлен шахьаре Магӏалбике, тахан сатем латт. Укхаза йоаржаду денала боламаш, Сийлахьча Коталон 81 шу дузаш хилара цӏайна хетадаь концерташ. Магӏалбике Коталон Ди дездаро хьагойт, цахаддаш бувзам хилар дӏаяхача, таханарча ханашта юкъе. Кагирхой денало хьагойт турпалхой дагалоаттам дийна болга, из дӏахо дӏахьош хургболга.
