Келаматанаькъан Махьмуд-Ӏаьлас бӀухошта, цар дезалашта новкъостал де дезилга белгалдир
«Нахацара къамаьл» яха передача дӀахьош, ГӀалгӀайчен Кулгалхочунга хаттараш делар, лаьрххӀача операце дакъа лоацаш болча бӀухоша, цар дезалаша.
Цхьа хаттар дар, тӀема даькъ тӀа чов хинначул тӀехьагӀа цӀавенача ГӀарбакханаькъан Бахьаудинагара.
Цун хаттар дувзаденна дар сердал, газ чуйилларца. Келаматанаькъан Махьмуд-Ӏаьлас аьлар, из хаттар кхоачашдергда. Из да трансформаторни подстанци хувца езаш хиларца дувзаденна, иштта паччахьалкхен программах газ, мах боацаш, чуйиллар.
БӀухочо белгалдир, из дехар ше цкъа даь Ӏийнавоацилга, бакъда цунна жоп кора ца деш висар. Цунна духьала жоп луш, Кулгалхочо аьлар, цох бехктокхаме бараш лохаргба.
Вай бӀухой вай доаккхал да, вай декхарийла да уж тӀема даькъ тӀа болаш санна, цул тӀехьагӀа а хьаллаца», - аьлар цо.
Лаьтта даларца дувзаденна хаттар луш вар бӀухочун Аьлданаькъан Адама да. Из безам болаш вар ший лаьтта ший воӀа дӀадала, бакъда из аренда бокъонах мара де йиш йолаш дац. Келаматанаькъан Махьмуд-Ӏаьлас тӀадиллар, доалахьарча хӀаманца ювзаеннача Министерствонна из дош юристашца тахка.
