ГӀалгӀай къаман
юкъара газет

Кердадараш

Мехкадас даькъалабийцар ГӀалгӀайчен бахархой, Россеца барт баьча Денца

ГӀалгӀайчен кулгалхочо Келматанаькъан Махьмуд-Ӏаьлас дег чура даькъалабийцар бахархой, Россеца барт баьча Денца, яхаш, хоам бир «Сердало» газетага республикан кулгалхочун зарбан болх лелабераша.

«Тахан вай дезду, Россе паччахьалкхенах вай дӀакхийтта 254 шу дизар. Вай доаккхал ду, ши бӀаь ах бӀаь шу совгӀа йолча хана, йоккхача Россе цхьа дакъа хинна вай хьадоагӀаш хиларах, дика кхетаду, вай даьша мел нийса никъ хержа хиннаб,1770 шера шоай вахар Россеца дувзадаь,-аьлар цо ше кхайкарал деш.

Макшарипа Махьмуд-Ӏаьлас белгалдир, цу атта йоацача ханашка ГӀалгӀайче Россеца цхьана йолаш паччахьалкхен хьалхашка нийслуш хиннача халонашта духьала лаьтта хилар.

Вай доаккхал ду, дукхача къамах латтача йоккхача Россе паччахьалкхенах дӀакхийттачул тӀехьагӀа, барт болаш, культуран мах бараш лорадеш, дика гӀулакхаш воашкара дӀагойташ вай къам хьадоагӀаш хиларах.

Тахан, Россе бокъо йола цхьа моттиг хиларах тарра, вай юкъехьу еррига паччахьалкхе дегӀаяра доккхача даькъа. Мохк, экономически хьал тоадеш, вахара политика кхоачашъеш, дегӀабоагӀаш ба. Дукха даьд дарбанчешка, дешара моттигашка, физически культуран, культурни дегӀаахара даькъ тӀа, дика хьалаш хургдолаш.

Республикан хьалхашка латт лоархӀаме декхараш, цунца цхьана йоккхий таронаш а я хьаеллаш. Массайолча кхыча республикашка санна, уж дувзаденна да къаман проекташ кхоачашъярца, из деш да наьха вахара хьалаш тоадара»,-аьлар ГӀалгӀай Республикан Кулгалхочо.

Махьмуд-Ӏаьлас белгалдир, наьха барт, цхьоагӀо хиларах, таро хул хьалхашка латта декхараш лерттӀа кхоачашде.

«Со тешаш ва, вай къаман хьаькъалца, барт, цхьоагӀо хиларца, вай дӀахо а ГӀалгӀайче дегӀайоалаяра доккха дакъа юкъехьоргда, вай мохк дегӀабоагӀаш, тоалуш хургба, беррига россен нах тӀаозаш а хургба»,- аьлар цо, ше ловца боаккхаш .

Махьмуд-Ӏаьлас дег чура ший мехкахошта дӀайхача дешашца кхайкадир ираз, машар, таро.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде