Келаматанаькъан Махьмуд-Ӏаьлас кодам бир фецарча кема тӀа хатар хиннарий дезалашка
Актау яхача шахьара гаьна доацаш, Embraer 190 фецарча кемаца хатар нийсделар, из доагӀаш дар Бакура Шолжа-ГӀалий тӀа. Цу хатарца дувзаденна Келаматанаькъан Махьмуд-Ӏаьлас бейнарий дезалашка, дег чура из хала а хеташ, кодам бир.
Ший телеграм-оагӀон цо аьлар, Российски Федераце бахархой цу тӀа хиннилга ховш да, баьча хоамах.
«ГӀалгӀайченга гӀайгӀа я, массаболча вай нахага санна. Эшаш дола новкъостал дара кийча а да», - аьлар Махьмуд-Ӏаьлас.
Embraer 190 фецара кема Казахстане сиха Ӏоахаде дезаш хиларах хоам баьбар. Юххьанца ховш хинначох, цунна новкъарло яьй оалхазараша, бакъда кӀеззига тӀехьагӀа гуш хилар фецара кема эккхаш моттиг нийсъеннилга.
ХӀанз укх сахьате, ховш да цу хатарах 32 саг кӀалхарваьннилга. ГӀуозлой мехка Генпрокуратуре из таьрахь тӀеххьара да ала йиш яц, яхаш, белгалду.
