Илдарха-ГӀалий тӀара моттигаш тоае лерхӀ
Мехкарча моттигий хьал тоадеш йола программа йоаржаергья республике. Эггара хьалхарча мугӀаре латт цу оагӀонца Илдарха-ГӀала. Вахара моттигаш тоаярах йолча федеральни программага гӀолла йоаржаеш я проект. Из хоам «Сердалога» бир Мехкадаь, Паччахьалкхен зарбан болх лелабераша.
Кхаь шера болх дӀахьош, 15, 5 км кхоачаш болх чакхбоаккхаргба шахьаре. Цу юкъе да 4, 9 км йолча моттиге хий чудиллар, 4, 6 км хий дӀа-юха дулла моттиг, 6 км кхоачаш йола догӀан хиш дӀауха моттиг. Иштта 18, 6 эзар совгӀа керда цӀенош хьалдеш болх дӀахьоргба, 2027-ча шерга кхаччалца.
БартчӀоагӀам баьб цу балха, дукха ца говш дӀаболалургба къахьега. Цу гӀулакхо дикка аттачахьа доаккхаргда бахархой хьал. ВӀаштӀара даь кхо цӀа хьалдеш бола болх дӀаболабаьб. Из бахьан долаш, кхаь шера чакхбоаккхаш бола болх 35 эзар совгӀа кв. метрага кхоачаш хила мег.
«Республике дӀахьош йолча КРТ программага гӀолла, мехкара моттигаш дикка тоае аьттув ба», - белгалдир вай мехкадас Келаматанаькъан Махьмуд-Ӏаьлас.
