ГӀалгӀайчен къаман проекташта хьохьажадаь ахча кассе гӀолла чакхдаьннад 88,9%
Карарча шера лайчилла бетта, ГӀалгӀайчен къаман проекташ кхоачашъе хьахьожадаь, кассе гӀолла чакхдаьнна ахча 88,9% да, из 10, 1% дукхагӀа да, дӀадахача шера укх хана хинначул. Мехка Паччахьалкхено шийна хьалхашка декхар оттаду, карарча шера 100% къаман проекташ кхоачашъе. Цох дийцар «Сердало» газетага ГӀалгӀай Республикан Кулгалхочун, Паччахьалкхен зарбан болх лелабераша.
«Экологи», «Кхерамзлен дика наькъаш», «Халкъашта юкъера коопераци, экспорт», «Туризм, хьаьший тӀаэцара хьал» яхача даькъош тӀара балхаш дизза кхоачашдаьд. Иштта дика кхоачашдеш да «ДегӀаахар» (92,1%), «УнахцӀено» (77,6%), «Дешар» (86,7%).
Мехка Кулгалхочун зарбан болх лелабераша ма аллара, къаман проекташ бахархой вахара хьалаш тоадара лаьрхӀа я, царга гӀолла хьалдеш да культуран цӀенош, керда ишколаш, наькъаш, кхы дуккхадар.
