Кассе гӏолла къаман проекташта эша ахча чакхдалар 76% кхоач
Гӏалгӏайчен Паччахьалкхено хӏара кӏира дӏахьош йолча кхетаче хоам бир, къаман проекташ кассага гӏолла кхоачашъеш хилар вай мехка 76% я, аьнна, хӏаьта контракташ оттаяра боарам 98% совгӏа.
Республикан кулгалхочо Келаматанаькъан Махьмуд-ӏаьлас белгалдир, Россе Президента Путин Владимира, къаман проекташ кхоачашъяра Совета гулламе терко тӏаяхийтар; къаман проекташ кхоачашъеш хилара чаккхе гуш хила еза, аьнна.
Белгалду, 2019-2024 шерашка Гӏалгӏайче хьожадир 50 млрд совгӏа сом. Цу юкъа вай хьалъяьй 380 гаргга объект, - аьлар Мехкадас.
Керттера терко тӏайохийт дешара оагӏонна: 26 млрд сом дӏахьожадаьд 41 ишкол, 26 берий беш хьалъеш.
Цул совгӏа, мехка хьалъяьй кхоъ вахара гӏулакх дара йола гӏишло, унахцӏенон пхиъ урхалле, 20 спортивни моттиг, ийс экологически гӏишло, 24 культуран цӏа. Цул совгӏа, кхоачашъяьй керда проект, 60 керда никъ хьабеш. Иштта тоадаьд 191 юкъарлон доазонаш, сквераш.
Карарча шера хьалъе лерхӏаш я 50 совгӏа керда вахаре эша гӏишлош, цу юкъе я ишколаш, наькъаш, юкъарлон моттигаш.
Аз паччахьалкхен, болх хьабечар тоабашта хьалхашка оттаду декхар да- хьабеча балха дикал хилийтар, шоай ханнахьа болх йистебаккхар», - аьлар Гӏалгӏайчен Кулгалхочо.
Белгалду, карарча шера къаман проекташ кхоачашъяра хьахьожадаьд 4,2 млрд сом, цох 3,4 федеральни бюджетера да, иштта 791 млн - моттигера.
