Болх дӀахьош йолча ворхӀ къаман проектах дийцар йоккхача кхетаче
ХӀара кӀира республикерча Паччахьалкхено дӀакхухьача кхетаче белгалдир, берригача мехка къаман ворхӀ проектага гӀолла болх дӀакхахьар тахан 8, 7% тӀа латтилга. Вай мехка из гӀулакх 79,9% тӀа латт, берригача мехка юкъера моттиг хьалаьцача 71,2% тӀа латтача хана. Мехкадас кулгал деш дӀайихьача кхетаче белгалдир, ювцараш «Экологи», «Кхераме доаца дика наькъаш», «Къамашта юкъера коопераци, экспорт», «Туризми хьаьший тӀаэцари», «ЗӀамига, доккха хӀама хьадар», «Демографи», «Дешар» яха къаман проекташ йолга. «Еррига къаман проекташ йоаржаяра тӀехьа дика дӀабодаш ба вай болх. 137-гара 109-га кхаьчад из гӀулакх. Къаман проекташка гӀолла укх шера дӀадахьа лаьрхӀадар 80-га кхоачаш балхаш. Царна юкъе дар 28 моттиг хьалъеш болх дӀабахьар, 20 доазув тоадеш къахьегар, цхьацца кхетаченаш дӀаяхьар.
Из деррига - керда ишколаш, ФОКаш, наькъаш, кердача куца тӀа доаладаь доазош», - белгалду вай Мехкадас Келаматанаькъан Махьмуд-Ӏаьлас ший телеграм-оагӀон тӀа. Къаман проекташка гӀолла тоае лаьрхӀа хинна дукхагӀа йола моттигаш тахан кийча я: Магасера, Наьсарера, Южнера ишколаш, МагӀалбикера вахара гӀулакхех йола моттиг, ЖӀайрахьера культуран цӀа, иштта кхыйола моттигаш. Укх шера тоабе лаьрхӀа хинна 14 никъ кийча ба.
«Цу оагӀонца дикка къахьегаш, дӀахо болх дӀабахьа беза вай, таханара проекташ кхоачашъяь даьлча, кердаяраш хьакхоллаш. Бахархой вахара хьал тоалургдолча наькъ тӀа болх дӀабахьа беза вай тахан», - аьлар Мехкадас къаман проектех дувцаш.
