Мехка финансай Министерствос яхачох, карарча шера декхар лаьгӀлургдолаш лоархӀаме гӀа баьккхар, цу юкъе республикан паччахьалкхен ахчанцара таро а тоалургйолаш. Цо социально-экономически дегӀаахара керттера дакъа дӀалоац. Керттердар да бюджете хьачудоагӀаш дар дукхагӀа хилар. Цул совгӀа, 2024 шера белгалду, йоалах гулдеш дола а йоалах гулдеш доаца а ахча бюджете дукхагӀа хьачудоагӀаш хилар.

«Кредитах дола декхар дӀадалара хаттар эггара лоархӀамегӀа да къаьстта тахан, халача экономически хьале из долча хана.

Дукха теркам тӀабахийта безаш хилар из хьал аттача доаккхаш, республикан бюджета хьатӀабоагӀаш бола пайда совбаккхара», - аьлар ГӀалгӀайчен Кулгалхочо Келаматанаькъан Махьмуд-Ӏаьлас, кхаь кварталах баьча балхах дувцаш.

Карарча шера Петербурге дӀайихьача халкъашта юкъерча экономически кхетаче мехка кулгалхочо аьлар, ше деррига кредит карарча шин шера дӀакъовла лаьрхӀа хилар.