Боккхача тӏема Коталон Денна хетабаь болам дӏабихьар мехкарча КСВО
Боккхача тӏем тӏа Котало яккхара хетаяь лоархӏаме кхетаченаш дӏахьош ба мехкарча тӏема операце доакъашхой дезалий Комитете. Наьсарерча вахара оагӏонцарча цхьаццадарех йолча колледже доккхача цӏайна хетадаь концерт дӏадихьар цар.
«Цу кхетачен хьалха эттар КСВО муниципальни штаб, Шутуранаькъан Мухьмада кулгал деш. Моттигерча комитета хьалха латтача Эсамарзанаькъан Ӏалаудина цӏерах гулбеннараш даькъалабийцар цо, иштта ший къамаьла юкъе белгалдир, бӏехача фашиста моттиг йохаеш, Котало кхачар вайх хӏаране дега лоархӏаме, доккха долга. 81 шу дузаргда укх деношка, моастагӏа ше чугӏортарах дехкевоаккхаш, вайга Котало кхаьча», - дийцар «Сердалога» цу моттигера.
Цӏайна хетаяь программа кийчъяр, дӏайихьар КСВО культуран оагӏонцарча моттига кулгал ду Мерешканаькъан Рита яр. Моастагӏа эшавара, советски эскарга Котало кхачара хетадаь иллеш дӏааьлар колледже цу дийнахьа. Даьхен лорабой дезалий комитета ерригача республике дӏахьоча дагалоаттама болама цхьа дакъа хилар цу концертах.
Цу оагӏонцарча балха юкъе, керттердар да вай къонача тӏехьенна Котало вай бӏухошка малагӏча маьхаца кхаьчай дӏахайтар, тӏема аренашка фашиста никъ хоадабеш лаьттарий истори дийндар!
