Шоашта гӀо дарах, баркал аьлар Курскерча бахархоша
Халача хьале эттача Курски областерча бахархошта гӀо дарах, доккха баркал аьлар цигарча наьха цӀерах Курски областерча Думанна хьалхалаттача Амерев Юре вай мехкадаьга Келаматанаькъан Махьмуд-Ӏаьлага, Халкъа Гуллама кулгал деча ТӀумхой Мухьмадага. Из хоам «Сердалога» бир Халкъа Гуллама зарбан болх лелабераша.
«Курскера бахархой доккха баркал оалаш ба гӀалгӀай мехкарча новкъосташта, шоай лаьтта эггара халагӀа ха латтача хана, оагӀув хьаллацарах. 81 шу хьалха санна, моастагӀашта духьала тӀом латт Курске. ЦӀенош дохадеш, маьрша нах бовш, дуккхабараш цигара удаш дӀаухаш, доккха хатар да эттар.
Бакъда тахан оаш тхоай оагӀув хьаллацаро, тха гӀайгӀа екъаш хиларо моастагӀа эшаргхиларах дог тешийт тха.
Вай цхьана хиларо, вӀаший гӀо деш латтаро коталонга кхоачадергда вай», - йоах Курскерча хьакима яйтача телеграмма тӀа.
