«13 шера бӀаьхбенна никъ» яха литературан сайре дӀайихьар «Дикача наьха Клубе»
«Дикача наьха Клуба» ганзо дӀайихьар «13 шера бӀаьхбенна никъ» яха литературан сайре, из вӀашагӀъеллар ГӏалгӀайчен, къам мехкахдаккхара дагалоаттама Мемориала болхлоша. Из хетаяь яр, деррига гӀалгӀай къам хийрача, гаьнарча мехка Ӏодахьийта 82 шу дузаш хилара, цо цӀаккха а ерзаргйоаца чов йитар наьха дегашка, дукхача тӏехьенашта.
«Ганза болхлоша дика дакъа лаьцар цига: бераш байташ йийшар, шоайла хиннараш дийцар, даь-дас е даь-нанас дувцаш хеза. МКЖР Ӏилман-дешара даькъа кулгалхочо Долакханаькъан Залинас дийцар 1944 шера вай къам мехкахдаьккха ханаш дагалоацаш дола хӏамаш. Уж чӀоагӀа хала ханаш хиннай. Бакъда, мел хала дале а, вай къам ца дохаш, денал, барт, цхьоагӀо йолаш юха мехкадаьлар», - аьлар «Сердало» газетага из кхетаче вӀашагӀъеллараша.
Из балане ди дицденна вӀалла ха йоагӀаргьяц вай къаманга, гӀалгӀай дегашка дусаргда из даим. Цо хьагойт, эггара халагӀча хана а сий, культура, дикача хӀамах тешар лораде йиш йолга; деналах ца вохаш, кердача тӀехьенна низ луш ваха йиш йолга.
