«Гулбеннарашта хозаш яр «Бека пандар, ека оаз» яхача концерта программа. Цу ашара цӏеро геттара дика дӏадовзийт гӏалгӏай ашарий ӏадата маӏан, цунца хоалуш я пандара ека оаз, кӏоарга иллиалара говзал, къаман са. Программа чудоагӏаш дар къаьнара халкъа иллеш, ашараш, лораеш лелаяьй уж филармоне тоабо, иштта цига гойтар халхараш, хоза дегӏа маьженаш лелаеш, ший тайпара ког шершабеш, иштта вай заман композицеш»,- аьлар «Сердало» газетага Гӏалгӏайчен керттера концерт вӏашагӏделларий зарбан болх лелабераша.

Хӏара шахьаре артисташ тӏоарашца, гӏадбахара оазашца, дешашца тӏаэцаш бар. Бе-беча моттигашка бахача вай къаман викалашта, Гӏалгӏайчен Паччахьалкхен филармони цига яха хилар йоккха дегагӏоз яр, шоай хьамсарча мехкара безаме хьал го йиш хиларах, хӏаьта кхыча къаман наха гӏалгӏай культура, ӏадаташ дайзар, цун мах оттабир.

Республикан Паччахьалкхен филармоне Хамхой Ахьмада цӏи лелаеш хиларах, артисташ декхарийла ба из лакха лоаттае, шоай балха говзал кхы а чӏоагӏагӏа дегӏайоалае. Хӏанз дӏайихьача гастролаша хьагойт, артисташа лораеш лелаеш хиларал совгӏа, дика вовзаш волча мехкахочун цӏи дӏахо а из дегӏайоалаеш, керда толамаш доахаш, эзараш болча мехка бахархой безам тӏаозаш хилар.

Гатролаш Соче ӏан театре чакхъяларах гуш да; сийрда, йоккха культуран программа дика дӏайихьа хилар. Из иштта дӏахьош хилар лоархӏаме а дар, хӏана аьлча из нийсъелар Соче, Гӏалгӏай Республикан Денош дездеча хана, уж хетадаь дар Россе халкъий цхьоагӏон Шу хилара. ӏан театре концерт дӏахьош хилар нийсделар; Паччахьалкхен филармонена, мехкашта юкъера бувзам чӏоагӏбу гастролей балха чаккхе еча хана. Ший цӏи хезача бӏоагӏашца, мах болча истореца наха дика довзаш долча ӏан театре программа дӏаяхьара лаьрххӏа майда харжаро хьагойт, артисташа дӏабихьа болх лоархӏаме хилар. Филармоне викалашта боккха а, бехктокхаме а бар из никъ, цунца цхьана уж дегагӏоз йолаш арабаьлар гӏалгӏай ӏадатий, таханарча культуран мах бараш дӏадовзийта.

Тӏеххьарча концертага хьажа баьхка нах дукха бар геттара. Гулбеннарашта лекхар къаьнара гӏалгӏай ашараш, уж екаш яр къаман пандарий гӏирсашца, иштта Гӏалгӏайчен хьалхале лелаеча солисташа гойтар таханарча заман композици. Царна нийсса гойтар гӏалгӏай халхарий хьинар, низ. Уж даим наха хоза хеташ тӏаэцаш да арахьа.

Ашарий оагӏув йоацаш а, ӏан театре массехк дийнахьа дӏабихьар Гӏалгӏайчен кулгаговзала искусство дӏайовзийташ бола гойтам. Цига го йиш яр вай заман суртанчий болх, лакха говзал йолча дахчанца, аьшкаца пхьараша баь болх, гӏалгӏай ӏадатий догамаш дара болх, къаман тӏабувхабу гӏирс, юкъерча бӏаьшерен замах яьча гӏалай кепаш.

Культура шоайла кхеташ хилара эггара лоацагӏа бола никъ ба. Сочена, дукхача къамий шахьара санна, Гӏалгӏайчен Денош лоархӏаме хилар мехка къулбехьен моттигашта юкъера бувзам чӏоагӏбеча даькъе.

Чакхъяьннача гастролашка хьежача гуш да, паччахьалкхен культуран политиканна пайда луш дола масал из хилар. Из йоккха программа вӏашагӏъелла яр «Вай - Росси» яхача федеральни программанна чуйоагӏаш, РФ культуран Министерствон гастрольно-концертни планах, цунца цхьана РОСКОНЦЕРТА хьаллоацаш.

«Вай - Росси» яха программа дӏайолаяьй 2020 шера, мехка цаӏ йола гастролий оагӏув меттаоттаеш, цо таро лу тайп-тайпарча мехкашка болх беш йолча тоабашта, шоай кхоллам дукхача наха гойта. Цу программаца дакъа лоацаш хиларо белгалду, Россе юкъарча даькъ тӏа гӏалгӏай къаман искусство мел лоархӏаме я.

Республикан культуран Министерствос белгалду, уж гастролаш мел эшаш я, цу тайпарча арахьа дӏабахаро массехк керттера декхар кхоачашду. Цкъа-дале, из къаман искусство дӏайовзийтар, цаӏ йола культуран оагӏув чӏоагӏъяр да. Цу тайпара таро хиларо, Россе къамий культурашцара наьха безам совбоаккх.

«Вай - Росси» яхача программанна чуйоагӏаш гастролаш еш хиларо, культураш дӏа-юха йовзара болх даим дӏабахьа таро лу. Артисташта хоалуш да шоаш боккхача кхоллама дезала цхьа дакъа хилар, хӏаьта хьожаш бараша кхетаду дукха а мах болаш а хилар юкъара культуран тӏехьале.

РОСКОНЦЕРТА новкъосталца мехка дикагӏа йолча моттигашка хила вӏаштӏехьдаьлар, концерта программа дӏаяхьош. Федеральни боараме из хьаллацар бахьан долаш, ше ма ярра къаман искусство дӏагойта таро хилар. Россе культураш дукха хиларо вӏашагӏтох керттера низ. Хӏара къаман ший ӏадаташ хиларга хьежжа доацаш, вай Россе бахача наха цхьа мотт лелабу – юкъарча мах барий мотт.

Даьхенцара безам, шоайла лоархӏаш хилар, хьаьша тӏаэцар, ший овла бовзаш хилар санна дола гӏулакхаш да хӏара сага дагахьа. Вай цхьоагӏо воайла кхеташ хиларца хьахулаш я. Бакъда вай дерригаш а, воайла эргаш да, дале а цу тӏа хьакхолл боккхача мехка низ, цо кхоллаш да юкъара истори, хадаш доаца дегай бувзамаш.