ГӀулакх довзараша яхачох, цу тайпара мах оттабеш хилар дувзаденна да, мехка фусамаш тоъаш цахиларца. Къаьстта республикан шахьарашка уж хьакхоачаш яц, нах чабахийтарах доахаш дола маьхаш а лохлуш дац. Моттигера хьал, хьагучох, мехка гӀолла цхьатарра латтачох тара да, хӀара шера шоай доалахьа фусамаш йолча наха маьхаш тӀадетташ латт.

Масала, вай столица Магас хьаийцача, из иштта долга гуш да. Тӏехьарча кхаь шера, квартирашка баха нах чубитарах дола ахча айлуш доагӀа. Цхьа цӀа долча квартирах 20 эзар сом дех бетта, хӀаьта ши цӀа долча фусамах 25-35 эзар сом. Цига мах оттабеча хана, теркалду малагӀа моттиг я, чура хьалаш миштад, мел йоккха я фусам. Шинна а оагӀорахьа лоархӀаме дола хаттар а къоастаду: коммунальни хьалех бола мах хьан дӀатела беза.

Дукха ха йоацаш, вай СМИ хоам беш яр, Level Group яхача компане дӀабихьача хаттарий балхах, дукхагӀа бола ГӀалгӀайчен бахархой арендах лелаеш йола фусамаш йита, шоай доалахьара фусамаш эцара тӀехьа ба. Цун бахьан да, тахан арендан мах лакха хилар, цудухьа дезале хьачубоагӀаш бола пайда кхоачам болаш хилац.

Цу гӀулакхаца дувзаденна латташ дола хьал а тайп-тайпара да, цхьайолча моттигашка дикка башхало йолаш а. Цхьаболча фусамий гӀулакхаца бувзабеннача наха яхачох, керда квартираш эцаш хилар лаьгӀденнад; шоллагӀчар яхачох, хӀара квадратни метр чӀоагӀа хоатташ я наха.

ГӏалгӀайче дукха вӀаштӀара даь цӀенош хьалдеш да, Российски Федераце кхыча моттигашка санна. Уж эца йиш яраш ба таро йола нах, шоай доалахьа цхьацца хӀама леладераш. Из дукхагӀча даькъе цхьацца балха тӀа аьттув, дика хьал долаш, кхийна дезал болча фусаме нийслу. Цар таро хул шоай гаргарча наха е квартира, е лаьтта, е цӀа эца.

Иштта квартирацара хаттар кхоачашдаьчул тӀехьагӀа, къона дезал дӀаболх Россе моттигашка деша а болх бе а, цига дикагӀа ахча луш бола болх шоашта лаха, цох пайда бе. Шовзткъа шу хьалха из нийсде йиш яр, «шабашка» оалача дешаца. Цу ханашка бӀарчча тоабаш, дукхагӀча даькъе новкъостий тоабаш а йолаш, иштта гаргара нах а вӀашагӀкхийте Советски Союза тайп-тайпарча областашкарча, краяшкарча, республикашкарча гӀишлошка болх бе болхар. Из дика лоархӀаш а дар, цун ший маӀан а дар: цига даьккхача ахчах машин эцар е саг йоалайора, цӀа хьалдора е йоӀ маьре йохийтар, фусамашка тайп-тайпара коа тӀара хьайбаш дӀадоладора, цхьан дешаца аьлча, вахара дикал лакхлора.

Дикача квартирашка баха уйла еш ба Россе дукха бахархой, иразе бахарга сатувсаш. Москвера квартира эцарах дукха мах бала беза, ипотека мах а иштта лакха ба, из цудухьа дуккханешта карагӀдаргдолаш а дац. МоллагӀа волча вахархочун эца йиш йола квартираш яц уж е маьхаш а дац.

Цудухьа ГӏалгӀайчен дукхагӀа бола бахархой шоай доалахьара боахамаш хьалде хьож. Цул совгӀа, тӀеххьарча 10 шера йоккхий гӀишлош коа хьалъяра тӀера дац вай. ВӀаштара даь цӀенош хьалдеш дале а, шоашта аттагӀа хургдола боахамаш де хьож хӀанз бахархой. Нах цецбаха гӀерташ, боахамаш деш хинна ханаш тӀехьайисай. Наха дика кхетадаьд, цу моча хьалах саг цецваргвоацилга…

Вай кагирхой дукхагӀча даькъе тӀабийрзаб шоай доалахьара боахамаш, керда технологеш юкъейоахаш, хьалдара; хьалхарча ноахалаша иштта даьдац уж боахамаш. Цу тайпара къахьегамхой вайна юкъе хиларах, ГӀалгӀайчен модульни оала гӀишлош юкъеяргья, принтерни оалача кепара пенаш хьалдотташ хилар даржаргда. ЧӏоагӀа а дика а хила тарлу лаьрххӀа кийчдаьча дахчах хьадеш, тӀехьара тӀа кирпишк йотта йиш йолаш дола цӀенош. Мехкахоша лехаргда, нахага хьакхоачаш йолча фусамга вугаш дола наькъаш.

Модульни оала цӀенош хьалдарах дийцача, цо таро лу цхьаболча дезала хьалхарча аргӀагӀа лардаш дӀайохка. Цул тӀехьагӀа, цхьа-шиъ кийча фусам эца, уж шоай лардаш тӀа ӀотӀаоттае. Кораш дӀаоттаде, ток, газ чуйилла - бокъонах доагӀаш долча беса баха.

КӀеззига ахча Ӏоадаьчул тӀехьагӀа, кхы а цхьа-ши комната эца йиш я, е йоккха зал е йиш я.

Керттердар да, шун кӀезиг-кӀезига квартираца дувзаденна хаттар дӀакъовла йиш хилар; дуккхача шерашка, шоай йоацача фусамах ахча телаш, вахачул дикагӀа да из .

Бакъда деррига а хургдац иштта атта, хӀаьта а ше лаьрхӀачунга кхачара тӀакхувш хуле, из хьахургдолаш да. Укхаза дагабох, Сибрера цӀабаьхкачул тӀехьагӀа, даьссача лаьтта баха хайша вай дай. Топпар, ча, къахьегам, наьха цхьоагӀо хиларо хьахилар саг тешаргвоаца дика. УрагӀдахар цӀенош, Ӏодаьхкар урамаш, наьха цӀеной тунгилгех урагӀболабелар цӀера кӀур; йӀовхал, безам, кхоачам чубессар гӀалгӀай фусамашка.

Ха-м дукхагӀча нахага яц, хьамсара дешархо. Вай дерригаш а цкъара чакхдоал цу наькъах, хӀара сага эшаш я хьамсарча цӀен йӀовхал, ший таронга хьежжа хьае йиш йола ший доалахьара фусам.