Цхьабараш юкъера барт эгӏабе, адам хьалхьоаде гӏерташ латте а, Россе бахархой шоайла барт чӏоагӏбеш, дикагӏа хургдар хьаллоацаш дӏабахара никъ хоржаш ба. Хала ханаш эттача, лоалургдий-хьогӏ ер аьле хеталу, бакъда, шийна хьалхашкара декхараш бехктокхаме кхоачашде ловш, наха юкъе беркатегӏа, цӏенагӏа хургдар доаржадеш дӏаваха гӏертачунга, халон тӏехьа атто йоагӏа массахана.

Кердача технологеша бувзам лоаттабе вайна лур боккха аьттув ба; бакъда, дийнача, вӏаший духьаллатташ деча къамаьлага хӏама кхоачаргдац.

Къамаш цхьанкхетара Ди дезде арадаьлар адам. Гуш дар, берригаш дог айденна, из цӏай дезаш, лоархӏаш болга. Вай къам массахана хиннад хьаьша веза лоархӏаш, цун гӏулакха ураотта кийча долаш, эггара дикагӏдар хьаьшанна аьнна лоаттадеш. Вӏаший гӏо деш, ийшача моттиге кулг кховдадеш хилар тахан а къаман наха юкъе долаш, лакха лоархӏаш да.

Магасерча «Барта Гӏала» юхе хиннача доккхача цӏайга хьежача гуш дар деррига. Иштта йоккха кхетаче из мо долча дийнахьа вайна лоархӏаме я.

Барт, безам наха хьаллоацилга хьахьокх цо. Тхьовра денз вай даьша, ноаноша хьадахьа ӏадаташ довза, леладе безам бараш а хӏара денна дукхагӏа ба вай къаманца.

Йоккхача кхетаче хьадийллар пхьегӏаш, ловзоргаш, куцала лелаю хӏамаш, иштта кхыдараш довзийташ дола гойтамаш. Пхьараша, говзанчаша гулбеннарашта йовзийтар Дала шоашта енна говзал. Долакханаькъан Лизай джинса кӏадах яьча хӏамашта бӏарг тӏаэтта бар къонабараш. Агенаькъан Мадинас ший кулгашца паспорта тӏайохка беттагаргаш хьаю, иштта блокноташ, зизаш. 

Цу кхетаче массанена довзийта хьаденадар цо ший балхаш. Совтанаькъан Хаде хьадаь сахьаташ, бусйоагоргаш, иштта кхыдараш къаьстта лоархӏаме моттиг дӏалоацаш дар. Тамашийна хоза кхелла балхаш дар уж. Атиганаькъан Беслана «Вай керамика» яха балхаш, Мутаӏаланаькъан Маринай «Шаьра мотт» яха ӏомавеш дола ловзорг массане бӏарг тӏаотташ хилар гойтаме.

Чӏоагӏа гӏадвугаш дар, вай къаман юкъе иштта начӏал дола нах хилар. Къарший-Черсий мехкара вайцига венача Французов Казбека хьокха оттадаьдар Кавказера лоамаш, гӏалаш гойташ дола сурташ. Шин мехка юкъера барт, бувзам белгалбеш дар из гӏулакх. Вай мехкадас Келаматанаькъан Махьмуд-ӏаьлас белгалдир, кхыбола нах безаш, массадолча къамашца барт болаш даха дезилга.

Йоккхача Россе дукха къамаш дах тахан, эрсашта, селашта, татарашта, узбекашта, черсашта, якуташта юкъе барт, цхьоагӏо хуле, вай боккха мохк хӏара денна тоалуш хургба, вай гӏулакх а лакхача моттиге латтаргда. Шахьара керттерча доазон тӏа машар, барт хьаллоацаш дола иллеш оалаш арабаьлар республикерча филармоне артисташ.

Имагожанаькъан Османа «Вай цаӏаш да», Охценаькъан Розай «Росси, маьрша хийла», Акхасаганаькъан Мовсара «Дӏа ма гӏо», Хьоашаланаькъан Лолитай «Росси», Малсаганаькъан Розай «Гӏалгӏай байракх», иштта Наьсарерча № 15 йолча ишколерча берий «Гӏалгӏайче» яха зовне дека иллеш дар майдан аре дӏалаьцца хозаш.

Дикача гӏулакхаша диканга бода никъ хьабелл! Иразе, беркате, машарца дахалда вай мехкара къамаш! Цӏаккха а ма бохалба вайна юкъера барт!