«Со цӀий дӀалуш ва» яхача проектага гӀолла, 2017-ча шера денз, ГӀалгӀайче дегӀадоагӀаш да тӀехка тӀум, цӀий дӀадалар. Семинараш, кхетаченаш дӀахьош; цӀий дӀадалара хьал дувц, иштта тӀахьех мехкахой цу дикача гӀулакха юкъе дакъа лоацаш хилара, хӀана аьлча из вай юкъара декхар да. Цу тайпара, наха дика хьаллоац из, сага вахар цох тийша дусача хана.

2024 шера денз, цӀий дӀадалара хьал тоалуш доагӀа, 68%-га кхоачаш лазар лацарах кхераш бараш лаьгӀбеннаб,  донорех  аханел дукхагӀбараш массахана хьаухаш ба.

2018 шерга диллача, республикан пхелагӀа дола дакъа мара  цӀий дӀадалара йола говзал йолаш дацар; хӀанз дӀахаьттача, хӀара виълагӀвар цкъа мукъагӀа цӀий дӀаденна хул, цу дикача гӀулакха юкъе дакъа лоацаш а ва.

«Тхо юхе да» яха проект бахьан долаш, хьинар дараш боккхий нах болча ух. Хала хете а, боккхий нах берригаш а бац молхаш, бытовой техника, иштта кхы дуккхадар эца могаш. Дикача наьха Клуба викалаша  теркам лоаттабу  цу  тайпарча боккхийча наха молхаш а иштта кхыйола эша хӀама эцаш; цул совгӀа, цар фусаме лостам а бу, эшар Ӏалашду.

Из болх лелабераша яхачох, цар   хьашташка хьожаш еча моттигаша дукхача хӀамай уйла яйт, цар лайна халонаш духьалъотт. Дег чура безам хул боккхийча наьха дог хьаста, дега йӀовхал царна яла.

Цу тайпарча дикача гӀулакхашка таро йоацача фусамашкара бераш дакъа лоацаш хургдолаш, вӀашагӀбеллаб «Баьццара лампа» яха  болх. Цу ганза чудоагӀа бераш спортивно-унахцӀенон, исбахьален-хозала, хьаькъал совдаккхара, психологически оагӀорахьа дегӀадоагӀаш да.

Цар даьша яхачох, бераш дика Ӏомалу наха юкъе лела, шоашта хетар хьаала, нийса уйла е. Цунна тешал ду ишколе дика дешаш уж хиларо.

ГӀалгӀай кхалнах массахана хиннаб  дог ураоттадара бола хьаст. Царга хьежжа хул дезалера хьал а. Дика хьинар долаш хиларах, вайна карагӀдоал цӀен кхуврч лелабе, лостам, цхьоагӀо лоаттае, бераш кхеде, иштта лакхача боарам тӀа хьаьший тӀаэца.

Цхьайолча хана, вай ноаной, йижарий шоай низ ураоттабаь, ца моге а моллагӀа йола хало шоашта тӀаэца кийча хул, бакъда цхьабараш из кхетадеш а хилац. «Халонаш тӀехьайитар» яха проект лаьрхӀа я, вахара халонаш нийсъеннача кхалнаха новкъостал лоаттаде. Говзанчаша, каст-каста тоабаш вӀашагӀ а йохкаш, кхоачашду царна хьалхашка нийслуш дола хаттараш. Кхалнаха шоаш яхачох, цу тайпарча дег чура деш долча къамаьло таро хулийт берашцара е маьрацара хьал аттача даккха. Цул совгӀа, дакъа лоацаш бараш хьож керда професси караерзае. Дукхабараш квалификаци хийца, шоашта безаш бола болх беш ба, уж коллективаца а дика тарлу.

ТӀеххьарча  ворхӀ шера ганзо беш бола болх ба, цӀийоацар яха лазар долча наха новкъостал дара тӀаберзабаь. «Цхьана цӀийоацар яхача лазара духьала» яхача болама чудоагӀаш, дешара моттигаш а тӀехьарча хана цу юкъейоалаш йоагӀа.

Белгалдаккха дезаш да, дешархоша дика кхетаду уж хаттараш, цар ха а,  шоай ахча а кходац уж кхоачашдара.

МоллагӀа дола гӀулакх дӀадоладеш, массахана дага хила деза тоабаша лоацаш дола дакъа. «Цхьатарра уйла еш» яхача дешаша хьалхатотташ хул лаьрхӀар, хӀана аьлча из бартаца деш да. Барт бола тоаба, из я толам баккхара кӀийле.

Хетаргахьа, дикача наьха Клубо цхьан тхов кӀалха вӀашагӀтехаб къахетаме, нахах дог лазаш бола нах.

Кхоачам болаш да, туркашкахьа мохк аьга  хатар хиннача хана, гуманитарни новкъостал гулдаь хилар дагадехача, иштта Палестина бахархошта а оарцагӀбаьлар. Эшача хана волонтераш, ди-бийса ца къовсаш, болх беш ба.

«Са хьамсара КДЛ! Цхьан хана сона гаьна яр хьо, бакъда хӀанз цхьана да вай.

Шо са дезал ба, са укх дунен тӀара зӀамига ираза чӀегилг я! Ираз долаш я со, укх хозача хана вай дезале дагалаьттар кхоачашхиларах, вайна юкъерча дуккхачарна из дицлургдац», - йоах ший балха новкъосташка кхайрал деш КДЛ кулгалхочо Матенаькъан Натас.

«Дегагара дегага» яхача дикача гӀулакхий сайре дӀайихьар, ганза 9 шу доалаш хиларца дувзаденна. Цо къаьгга хьагойтар ГӀалгӀайчен юкъарло могаш доацача берашта новкъостал де дег чура кийча хилар.  ТӀаьрге дехкар «Вешта аьлча» яха байтий книжка, «Истинга» кӀувсаш, дикагӀчарех лоархӀаш бола кхалнаьха тӀабувхабу гӀирс, гӀалгӀай футболиста Оздой Мухьмада футболка. Деррига гулдаь ахча хилар 2 296 250 сом

«Массанена новкъостал де вӀаштӀехьа дац вай, бакъда хӀаравар йиш йолаш ва цхьаннена новкъостал де»- къаьстта из да ГӀалгӀай Республикан лоӀамхоша шоай балха тӀа керте лоаттадер.

80 процентага кхоачаш, новкъостал дераш ба бахархой, цудухьа вай кара да цхьанне вахар иразе де.

Сийрда а атта а хилба, дика гӀулакхаш леладерий никъ. Могаш мел воацачунна дарба хилда. Вай фусамашка ираз хилда массахана.