Росси дегӀайоалаеш юкъедихьа дакъа
ГӏалгӀайчен ши викал «Къаман курал - 2025» яхача преме лауреаташ хилар
Махачкале «Росси - са истори» яхача исторически парка майдан тӀа хилар, лаьрххӀа йола «Къаман курал - 2025» яха Ерригроссийски юкъарлон преми куран даькъ тӀарча лауреаташта дӏалуш, уж безбар. Цига гулбелар тайп-тайпарча профессеш а ханаш а йола нах Россе этнокультуран мах бараш лораде гӀертаро вӀашагӀтехабар уж.
Россе къамий Ассамблея керттерча кулгалхочо Даркович Александра, Ассамблея председатела Васильев Владимира цӀерагӀа моаршал хаьттар Къилбаседа Кавказа моттигашкарча яхьа доакъашхошка. Цо белгалдир, российски мехкий бахархой вӀашагӀтеха йола преми кердача боарам тӀа яьнна хилар.
«Карарча шера Ассамблейс дӀайолаяь проект кердача боарам тӀа яьлар, хьалхара чулоац цо куран доакъош, иштта вӀашагӀтохаш мехка берригача бархӀ федеральни куран доазонаш», - аьлар Дарковича.
Къаьстта белгалъе лов, ГӏалгӀай Республикан лауреатий цӀераш. «Тха юхьмараш» яхача журнала керттера редактор Курскенаькъан ИбрахӀим лауреат ва, цунна преми еннай «Паччахьалкхен къаман политика хоамашца дӏаяхьара дакъа юкъедахьарах» яхача даькъ тӀа. Цо, къаман политикан хаттараш довзийташ, къамашта юкъера барт чӀоагӀбеш, дӀахьош болча балха лакха мах оттабир кхелахоша.
Томбенаькъан Мовсар, бокъонаш лораяра органий болхло ва, иштта цо СВО доакъашхошта гуманитарни мухь лоаттабу, из ва «ЦаӀ массанена» яхача даькъ тӀа лауреат. Цо хьалхарча мугӀарашка латтача вай СВО бӀухошта новкъостал лоаттадеш къахьегарах, из массане тӀаийцар.
«Къаман курал» яха преми - из лоархӀаме майда я наха карагӀдаьннар довзара, иштта шоаш юкъарлон хетабеш, вай мехка культуран тӀехьале лораеш хьабоагӀача наха. Дика хет къаьстта вай викалашта уж совгӀаташ денна. Цо хьагойт, ГӏалгӀайчено шийгара къаьстта дола дакъа юкъедахьаш хилар Россе дукхача къамий цхьоагӀо чӀоагӀъяра. Россе халкъий Ассамблейна баркал оал из лоархӀаме кхетаче дӀаяхьарах, иштта вай мехка турпалхой безбе таро хиларах»,- аьлар «Россе къамий Ассамблея» гӀалгӀай отделене кулгалхочо Бӏарахой Мадинас.
Кхетаче чакхйоалаш «Россе къамий Ассамблея» Селий Республикан моттигерча даькъа кулгалхочо Ильясов Зикрулас баркал аьлар Ассамблея кулгалхошта, цу тайпара куран кхетаче Селий лаьттан тӏа дӀаяхьарах, иштта баркал аьлар гулбенна хиннача доакъашхошта а. «Къаман курал» яхача преме цӀаькха а чӀоагӀдир, Россе боккъонца бола турпалхой бахилга, шоай къахьегамца, дикача гӀулакхашца барт чӀоагӀбеш, мохк тоабеш.
«Къаман курал» яхача преме доакъош дӀахьоргда федеральни куран тайп-тайпарча моттигашка. Хила тарлу, хьаша-да тӀаэцаш болча Селий мехка тӀехьа, аргӀанара преми «Къаман курал-2026» ГӏалгӀайчен мехка луш а.
