Мотт - вай тӀехьале
Метташ таьрахьашка дахара кхелахочо «Даьй тӀехьале» яхача кхетаче къамаьл дир
Метташ таьрахьашка дахара наькъаш кхоллаш волча Курскенаькъан ИбрахӀима кхелахочо санна къамаьл дир, Халкъашта юкъерча V-ча историко-патриотически «Даьй тӀехьале» яхача кхетаче, из хилар Дербенте. Из дӀаяхьа хьалхадаьккхар яр лаьзгий къаман-культуран Федеральни автономи, къамий гӀулакхех йола Федеральни агентство. Из болх хьаллоацаш яр къамашта юкъерча гӀулакхех йола РФ Президента чуйоагӀа Кхел, иштта ФГБУ «Россе къамий Цӏа».
Кхетаче хетаяь яр Россе къамий метташ лорадарах, таьрахьашка дахарах, дегӀадоаладарах долча дешашта.
«Кхетаче хьайийллар ФЛНКА президента Гасанов Васифа. Цун балха юкъе иштта дакъа лоацаш вар къамашта юкъерча гӀулакхех вола Ярославски областа губернатора гӀонча, Россерча Федеральни гуржий НКА къамашта юкъерча гӀулакхех вола президент Цецхладзе Давид, ФГБУ «Россе къамий Цӏен» меттай проекташ кхоачашъеча даькъа кулгалхочун гӀонча Творожникова Анна.
Кхетаче вӀашагӀъеллаяр лакхача боарам тӀа, берригача доакъашхошта пайдане а яр. Дукха пайда луш дола къамаьлаш дир цига. Къаьстта лоархӀаме дар, Дагестан - дукхача къамий, дукха динаш леладу республика хилар, цудухьа аз даь къамаьл а укхаза чӀоагӀа эшаш хилар, хӀана аьлча къаьстта укхаза да Россе къамий меттай диълагӀа дола дакъа.
Аз царна довзийтар гӀалгӀай мотт таьрахьашка баккхара тахан деш дар, сайна гуш йолча хьалхашка нийслуча халонех. Ма дарра аьлча, кхетаче чӀоагӀа пайдане а эшаш а яр», - аьлар Курскенаькъан ИбрахӀима.
Программанна чудоагӀаш дар ФЛНКА даькъ тӀара проекташ гойтар. Наьна мотт лорабара хьакъехьа докладаш йир «Россе къамий Цӏенна» чуйоагӀача Россе юкъарча НКА тоабо, иштта цига дийцар «Дукхача къамий метташ лорадара хаттараш - малав бехке, фу де деза?» Цул совгӏа де вӏаштӏехьдаьннар гойтар мотт лорабара, таьрахьашка баккхара даькъе.
Шоай балха говзал гойтар тайп-тайпарча моттигашкара баьхка хиннача Ӏилманхоша, журналисташа, юкъарлон болхлоша, метта хьал леладераша. Царна юкъе вар поэт, таржамхо Чеканов Евгений, «Лъыоравэтлъан» ИОС президент Гульвайра Куценко, DS Corporate кхоачашдара директор Болдаков Эдуард, иштта «Наши лица» журнала керттера редактор Курскенаькъан ИбрахӀим.
Кхетаченна чуйоагӀаш, доакъашхошта лаьрхӀа вӀашагӀъеллаяр экскурси, Дербента иштта Нарын-Кала исторически центре гӀолла, цул совгӀа говзанча хьехамаш делар къаман культуран гӀирсаш тегарах, догамаш дарах, иштта топпара хӀамаш хьаяра гӏулакхах.
