Мах баь варгвоаца ганз
Метта политиках йолча лоархӀамеча кхетаче дакъа лаьцар вай республико
ЦӀихезача байтанчас Пушкин Александра хетаяь VӀӀӀ-гӀа «Меттацара политика Российски Федераце» яха йоккха кхетаче дӀайихьар Москве. Ерригача Россе яхье белгалваьккхарех хилар «Вай йовхьамаш» яхача журнала керттера редактор вола Курскенаькъан ИбрахӀим. Укх бетта 10-ча, 11-ча деношка дӀайихьар из лоархӀаме кхетаче. Цига дакъа лоацаш бар Россе тайп-тайпарча моттигашкара меттаца къахьегаш, цун тохкамаш деш бола нах.
Боккхача Ӏилманхоша, говзанчаша, тематически сессеш дӀакхухьаш, дийцар метта политикаца дувзаденнараш, Россе къамий метташ лорадара, тоадара тӀехьа РФ дӀакхихьача балхах. ХӀара мотт – из вӀалла а хам, мах баь варгвоаца, деррига дуне довзийташ йола ганз я. ХӀара сага вахаре эггара лоархӀаме долча хӀамаех хиннаб мотт массахана. ХӀаьта, шоай мотт боабаьрий, из бицбаьрий дукха хӀама дайнад! Моттигашкара эггара толашагӀа йола проекташ кхоллаш йолча яхьашка котбаьннарий цӀераш яьхар кхетаче. Россе къамий ЦӀенна кулгал деш йола Полежаева Анна яр белгалбаьннарашта совгӀаташ дӀадийкъар.
Боккха пайда боаржабеш долча цу дикача гӀулакха юкъе дакъа лаца геттара раьза болаш хилар Россе бахархой. Цун 42 моттигера 206 дехар дар укх шера яхьашка чуденнараш, царна юкъе яр керда моттигаш а. Метта кӀоаргал, цун бӀаьхий хилар лораде, цун кхоане эшам болаш ца хилийта гӀерт адам. Хьалхара моттиг дӀаелар «ХӀаравар хьахоз тхона» яхача тӀема, къахьегама ветераний, тӀема низах йолча Саратовски областерча Александрово-Гайски кхален юкъарлонна.
ШоллагӀа моттиг кхаьчар Федеральни лаьзгий къаман культуран автономе «Массане юкъара долча ЦӀен тхов кӀалха» яхача проекта. КхоалагӀа моттиг елар таьрахьий сервиса юкъе таржамхошта цаӀ йола платформа хилийтара тӀехьа хьинаре къахьегаш, боккха болх дӀахьош воаллача «Вай йовхьамаш» яхача журнала керттера редактор волча Курскенаькъан ИбрахӀима вӀашагӀъеллача проекта. Белгалде деза, котало яьккха проекташ, 2025-ча шера Россе къамий ЦӀено хьаллоацаш, йоаржае лерхӀилга. ЛоархӀаме, боккха болх ба из вай мехкарча къамашта. Из тамашийна дика кхетаче дӀахьош, «Керттера дош» яха бе-бе метташ лорадарах йола Ерригроссийски хӀарман VӀӀӀ-гӀа преми дӀаелар дикагӀчарна.
Котбаьннарий цӀераш яьхар кхетаче:
«ДикагӀа йола» - «Пушкинцара бутт» яха Донецкерча паччахьалкхен академически филармоне проект;
«Доккха доацача къамий мотт лорабар» - «Koryak tuyu» яха проект, Беринг Витуса цӀерах йола Камчаткера паччахьалкхен университет;
«ДикагӀа йола мультимедийни проект» - «Къаман эггара дезагӀдар» яха мобильни ловзар;
«ТолашагӀа йола издательски проект» - мошкански меттах дола берашта лаьрхӀа энциклопеди «Мялезе семботь содамс» («Хочу знать все»);
«ТолашагӀа йола Ӏилман проект» - нохчий метта орфографически дошлорга, нохчий метта институт;
«Къаьстта белгалваларах» - селий мехкара Газимагомедов Рамзан;
«Аз сайна сийленг оттадаьд…» - «Пушкини Казаньи» яха проект.
Теркалде деза, Ӏилманхой, тайп-тайпарча оагӀонца къахьегаш хьабоагӀа дукха говзанчаш этта, меттаца дӀахьош бола боккха болх хӀара къаман вахаре лоархӀаме, мах баь варгвоацаш болга. Ший къаман мотт бувцаш, цӀена ховш бола нах ма хулла дукхагӀа хилийта гӀерташ дӀаболабаь къахьегам ба из вай республике, иштта Россе ерригача моттигашка.
